வீட்டு மனைப் பட்டா வழங்கப்படுமா?

சென்னை வியாசர்பாடியில் வசிக்கும் பர்மா தமிழர்களுக்கு வீட்டு மனைப் பட்டா வழங்கப்படுமா என்று மார்க்சிஸ்ட் கம்யூனிஸ்ட் கட்சியின் பேரவைக் குழுத் தலைவர் அ.சௌந்தரராஜன் கேள்வி எழுப்பினார்.
 சட்டப் பேரவையில் வருவாய்த் துறை, செய்தி, விளம்பரத் துறைகள் மானியக் கோரிக்கைகள் மீதான விவாதத்துக்குப் பிறகு அவர் பேசியதாவது:
 அனைத்து நீர்நிலைகளிலும் சட்ட விரோதமான ஆக்கிரமிப்புகளைக் கண்டறிந்து அகற்றவும், அவற்றை பழைய நிலைக்குக் கொண்டு வரவும் நீதிமன்றம் உத்தரவிட்டுள்ளதாக அமைச்சர் உதயகுமார் தனது பதிலுரையில் தெரிவித்தார்.
 ஆனால், ஏரிகள் உள்ளிட்ட நீர்நிலைகளில் மாவட்ட ஆட்சியர் அலுவலகங்களும், பேருந்து நிலையங்களும் கட்டப்பட்டுள்ளன.
 பல ஆண்டுகளுக்கு முன் வியாசர்பாடி ஏரியில் மாநில அரசால் குடியமர்த்தப்பட்ட பர்மா தமிழர்களில் ஒரு பிரிவினருக்கு இன்னுமும் பட்டா கிடைக்கவில்லை. அவர்களுக்கு பட்டா வழங்கப்படுமா என்று சௌந்தரராஜன் கேள்வி எழுப்பினார்.