எட்டயபுரத்தில் பாரதி விழா தொடங்கியது

தூத்துக்குடி மாவட்டம், எட்டயபுரத்தில் தமிழ்நாடு கலை இலக்கியப் பெருமன்றத்தின் கிளை அமைப்பான பாரதி முற்போக்கு வாலிபர் சங்கம் சார்பில் 54-ஆம் ஆண்டு மகாகவி பாரதி விழா சனிக்கிழமை தொடங்கியது.

விழாவுக்கு மாநிலங்களவை உறுப்பினர் டி.ராஜா, முன்னாள் எம்.பி. அப்பாத்துரை ஆகியோர் முன்னிலை வகித்தனர்.

விழாவில் டி.ராஜா பேசியதாவது: புதிய இந்தியாவை நோக்கி பயணித்த மகாகவி பாரதி என்றும் நிரந்தரமானவர்.

பாரதி கண்ட புரட்சிகரமான கனவுகளை நனவாக்க ஒவ்வொரு இந்தியரும் இந்த சமுதாய நலனுக்காகவும், நாட்டின் சமூக நீதிக்காகவும் முனைப்புடன் செயல்பட வேண்டும். புதிய சிந்தனையைத் தன் வாழ்நாள் முழுவதும் வலியுறுத்தி வந்த பாரதி பன்முகத்தன்மை வாய்ந்த பெரும் போராளி என்றார் அவர்.

இதையொட்டி நடைபெற்ற படத்திறப்பு நிகழ்ச்சியில், மறைந்த விடுதலைப் போராட்ட வீரர் ஐ.மாயாண்டி பாரதியின் உருவப் படத்தை, பாரதி ஆய்வாளர் இளசை மணியன் திறந்து வைத்தார்.

இன்று... ஞாயிற்றுக்கிழமை (செப். 27) நடைபெறும் நிறைவு விழாவில் காலை 10 மணிக்கு மறைந்த எழுத்தாளர் ஜெயகாந்தனின் கலை இலக்கிய ஆளுமை என்ற தலைப்பில் நடைபெறும் கருத்தரங்க நிகழ்ச்சிக்கு பேராசிரியர் எஸ்.தோதாத்ரி தலைமை வகிக்கிறார்.

மாலை 5 மணிக்கு பள்ளி, கல்லூரி மாணவர், மாணவிகள் பங்கேற்கும் யோகா உள்ளிட்ட பல்வேறு கலைநிகழ்ச்சிகள், கவிதாஞ்சலி ஆகியன நடைபெறும். இரவு 8.30 மணிக்கு "பாரதியின் பாடல்களில் விஞ்சி இருப்பது மண் உரிமையே, மனித உரிமையே' என்ற தலைப்பில் கு.ஞானசம்பந்தன் நடுவராகப் பங்கேற்கும் பட்டிமன்றம் நடைபெறும்.