வஉசி துறைமுகத்துக்கு ரூ. 622 கோடி வருவாய்

தூத்துக்குடி வஉசி துறைமுகத்துக்கு கடந்த நிதியாண்டில் ரூ. 622.75 கோடி வருவாய் கிடைத்துள்ளது என்று துறைமுக பொறுப்புக் கழக தலைவர் ஐ. ஜெயக்குமார் தெரிவித்துள்ளார்.
இதுகுறித்து அவர் வெளியிட்ட செய்திக்குறிப்பு:
தூத்துக்குடி வஉசி துறைமுகம் கடந்த 2017 -18 நிதியாண்டில் 365.83 லட்சம் டன் சரக்குகளை கையாண்டுள்ளது. 2016 -17 நிதியாண்டில் கையாளப்பட்ட 384.63 லட்சம் டன் சரக்குகளைவிட தற்போது 4.89 சதவீதம் குறைவாகவே சரக்கு கையாளப்பட்டுள்ளது. இறக்குமதியை பொருத்தவரையில் 261.71 லட்சம் டன்களும், ஏற்றுமதியை பொருத்தவரையில் 104.12 லட்சம் டன்களும் கையாளப்பட்டுள்ளது.
மேலும், 2017-18 நிதியாண்டில் 6.97 லட்சம் சரக்குப் பெட்டகங்களை கையாண்டு சாதனை படைத்துள்ளது. இந்த சாதனையானது, கடந்த நிதியாண்டில் கையாண்ட 6.42 லட்சம் சரக்குப் பெட்டகங்களை ஒப்பிடுகையில் 8.65 சதவீதம் கூடுதலாகும். 
கப்பல்கள் தளத்துக்காக காத்திருக்கும் சராசரி நேரமானது, 2017 -18 நிதியாண்டில் 1.27 நாள்களாக குறைந்துள்ளது. கப்பல் காத்திருக்கும் இடத்தில் இருந்து தளத்துக்கு வந்து சரக்கு கையாண்டு வெளியே செல்லும் வரை உள்ள சராசரி கால அளவு 2017-18 நிதியாண்டில் 2.69 நாள்களாக குறைந்துள்ளது.
2017-18 நிதியாண்டில் துறைமுகத்தின் இயக்க வருவாய் ரூ. 622.75 கோடி ஆகும். அதற்கு முந்தைய நிதியாண்டின் இயக்க வருவாய் ரூ. 597.93 கோடி ஆகும். 2017-18 நிதியாண்டு இயக்க உபரி வருவாய் ரூ. 372.56 கோடி ஆகும். அதற்கு முந்தைய நிதியாண்டில் இயக்க உபரி வருவாய் ரூ. 350.02 கோடி என அந்தச் செய்திக்குறிப்பில் தெரிவிக்கப்பட்டுள்ளது.