ரூ.24 ஆயிரம் லஞ்சம்:  கிருஷ்ணகிரி தொழிலாளர் துணை ஆய்வாளர் கைது

ஒசூர்: ரூ.24 ஆயிரம் லஞ்சம் வாங்கியதாக கிருஷ்ணகிரி தொழிலாளர்  துணை ஆய்வாளரை லஞ்ச ஒழிப்பு போலீஸார் வியாழக்கிழமை கைது செய்தனர்.
கிருஷ்ணகிரி தொழிலாளர் துறையில் துணை ஆய்வாளராகப் பணிபுரிந்து வருபவர் ராமு (55). இவர் சூளகிரி பகுதியில் உள்ள பெட்ரோல் விற்பனை நிலையங்களில் அளவீட்டு கருவிகளை ஆய்வு செய்து, "சீல்' வைப்பதற்காக சென்றார். அப்போது, அங்குள்ள ஒரு பெட்ரோல் விற்பனை நிலையத்தில் அதற்கான கட்டணத் தொகையை வசூலித்ததுடன் லஞ்சமாக ரூ.24 ஆயிரம் கேட்டாராம்.
லஞ்சம் கொடுக்க விரும்பாத பெட்ரோல் விற்பனை நிலைய நிர்வாகத்தினர், இது தொடர்பாக கிருஷ்ணகிரியில் உள்ள லஞ்ச ஒழிப்பு போலீஸாருக்கு புகார் செய்தனர்.
இதையடுத்து, லஞ்ச ஒழிப்பு போலீஸார் ஆலோசனைப்படி, ரசாயனப் பொடி தடவப்பட்ட ரூ.24 ஆயிரத்துக்கான நோட்டுகளை ராமுவிடம் கொடுப்பதற்காக அங்குள்ள உணவகத்துக்கு பெட்ரோல் விற்பனை நிலைய நிர்வாகத்தினர் வரச் சொன்னார்களாம்.
அதன்படி, ராமு வியாழக்கிழமை இரவு சூளகிரி தேசிய நெடுஞ்சாலையில் உள்ள ஒரு உணவுகத்துக்குச் சென்று பணத்தைப் பெறும் போது,  அங்கு மறைந்திருந்த லஞ்ச ஒழிப்பு போலீஸார் ராமுவை கையும் களவுமாகப் பிடித்துக் கைது செய்தனர். தொடர்ந்து, அவரிடம் துறை ரீதியான விசாரணை நடைபெற்று வருகிறது.