திருவாரூரில் ஜூன் 1-இல் கருணாநிதி பிறந்த நாள் பொதுக்கூட்டம்

திமுக தலைவர் கருணாநிதியின் 95-ஆவது பிறந்த நாள் விழா பொதுக்கூட்டம் திருவாரூரில் ஜூன் 1-ஆம் தேதி நடைபெறும் என்று அக் கட்சியின் செயல் தலைவர் மு.க.ஸ்டாலின் அறிவித்துள்ளார்.
இது தொடர்பாக திங்கள்கிழமை அவர் வெளியிட்ட அறிக்கை: கருணாநிதிக்கு உடல் அசைவுகள் கொஞ்சம் குறைந்திருக்கலாம். ஆனால் அவரின்றி எதுவும் அசைவதில்லை. அரை நூற்றாண்டுக்கால அரசியல் வரலாற்றில் இந்தியாவில் வேறெந்தத் தலைவருக்கும் இல்லாத பெருமைகளைக் கொண்டவர் அவர். எப்போதெல்லாம் மாநிலத்திலும் மத்தியிலும் அரசியல் நெருக்கடிகள் நேர்கின்றனவோ அப்போதெல்லாம் அவர் வகுத்தளிக்கும் வியூகங்களே தீர்வுகளாக அமைந்து வந்துள்ளன.
கருணாநிதி தனது 95-ஆவது பிறந்த நாளை ஜூன் 3-ஆம் தேதி கொண்டாட உள்ளார். இந்த நாளை திமுகவினர் அனைவரும் மகிழ்ச்சியுடன் கொண்டாட வேண்டும். திருவாரூரில் உள்ள அண்ணா திடலில் ஜூன் 1-ஆம் தேதி பொதுக் கூட்டம் நடைபெற உள்ளது. இந்தக் கூட்டத்துக்கு பொதுச் செயலாளர் க.அன்பழகன் தலைமை வகிக்கிறார். திமுகவின் தோழமைக் கட்சித் தலைவர்களும், நானும் பங்கேற்க உள்ளோம். கூட்டத்தில் பெருந்திரளாக மக்கள் பங்கேற்க வேண்டும் என்று அவர் கூறியுள்ளார்.