ராஜீவ் நினைவிடத்தில் தலைவர்கள் அஞ்சலி

முன்னாள் பிரதமர் ராஜீவ் காந்தியின் நினைவு நாளையொட்டி, ஸ்ரீபெரும்புதூரில் உள்ள அவரது நினைவிடத்தில் காங்கிரஸ் தலைவர்கள் திங்கள்கிழமை மலர்தூவி மரியாதை செலுத்தினர்.
ராஜீவ் காந்தியின் 27ஆவது நினைவு நாளையொட்டி ஸ்ரீபெரும்புதூரில் உள்ள அவரது நினைவிடத்தில் தமிழ்நாடு காங்கிரஸ் தலைவர் திருநாவுக்கரசர், முன்னாள் மத்திய அமைச்சர் கே.எச்.முனியப்பா, முன்னாள் மாநிலத் தலைவர் தங்கபாலு, முன்னாள் எம்.பி.க்கள் விஸ்வநாதன், ஜே.எம்.ஆரூண், திருப்பதி தேவஸ்தான முன்னாள் அறங்காவலர் குழுத் தலைவர் பாபி ராஜு, எம்.எல்.ஏ.க்கள் வசந்தகுமார் (நாங்குநேரி), கணேஷ் (ஊட்டி), காளிமுத்து (தாராபுரம்), ராஜீவ் காந்தி நினைவிட சீரமைப்புக் குழு உறுப்பினர் முருகானந்தம், கட்சியின் மாநில பொதுச் செயலாளர் சிரஞ்சீவி, கர்நாடக மாநில காங்கிரஸ் நிர்வாகிகள் சுதாகர் ரெட்டி, பிரகாசம், மாவட்டத் தலைவர்கள் ரூபி மனோகரன், மதியழகன், சுந்தரமூர்த்தி, ஸ்ரீபெரும்புதூர் நகர காங்கிரஸ் பொறுப்பாளர் அருள்ராஜ், முன்னாள் கவுன்சிலர் பி.வி.தமிழ்ச்செல்வன் ஆகியோர் கட்சி நிர்வாகிகள், பொறுப்பாளர்கள், தொண்டர்கள் மலர்தூவி மரியாதை செய்தனர்.
தீவிரவாத எதிர்ப்பு உறுதிமொழி: முன்னதாக, திருநாவுக்கரசர் தலைமையில் காங்கிரஸ் கட்சியினர் தீவிரவாத எதிர்ப்பு உறுதிமொழியை எடுத்துக் கொண்டனர். 
இதையடுத்து இரண்டு நிமிடம் மௌன அஞ்சலி செலுத்தப்பட்டது. அதற்கு முன், கர்நாடக காங்கிரஸ் தொழிற்சங்கத் தலைவர் எஸ்.எஸ்.பிரகாசம் தலைமையில் தொண்டர்கள் தங்கள் மாநிலத்தில் இருந்து எடுத்து வந்த ஜோதியை ராஜீவ் காந்தி நினைவிடத்தில் வைத்தனர்.
ராஜீவ் காந்தியின் நினைவிடத்தில் இளைஞர் காங்கிரஸ் சார்பில் ரத்த தான முகாம் நடைபெற்றது.