தினக்கூலி தொழிலாளர்களின் மாத ஊதியம்: அரசு பதிலளிக்க உத்தரவு

தினக்கூலி தொழிலாளர்களின் குறைந்தபட்ச மாத ஊதியத்தை உயர்த்துவது மற்றும் தொழிலாளர்களுக்கான இழப்பீட்டுத் தொகையை அதிகரிப்பது குறித்து மத்திய, மாநில அரசுகள் பதிலளிக்க, சென்னை உயர்நீதிமன்றம் உத்தரவிட்டுள்ளது.
பசிபிகா என்ற நிறுவனத்தில் வெல்டராக பணியாற்றியவர் விக்னேஷ். இவர் கடந்த 2015 -ஆம் ஆண்டு பணியின்போது அடுக்குமாடியிலிருந்து தவறி விழுந்து உயிரிழந்தார். இதனையடுத்து விக்னேஷின் பெற்றோர் தங்களுக்கு இழப்பீடு வழங்கக் கோரி சென்னையில் உள்ள தொழிலாளர் நல ஆணையத்தில் முறையீடு செய்தனர். இந்த முறையீட்டை விசாரித்த ஆணையம், விக்னேஷின் பெற்றோருக்கு ரூ.8.95 லட்சம் இழப்பீட்டுத் தொகையை 30 நாள்களுக்குள் வழங்க வேண்டும் என உத்தரவிட்டது.
இழப்பீட்டுத் தொகையை உயர்த்தி வழங்கக் கோரி விக்னேஷின் பெற்றோர் சென்னை உயர்நீதிமன்றத்தில் வழக்கு தொடர்ந்தனர். இந்த வழக்கு நீதிபதி என்.கிருபாகரன் முன் விசாரணைக்கு வந்தது.
வழக்கை விசாரித்த நீதிபதி, வெல்டர் பணிக்கு குறைந்தபட்ச ஊதியமாக மாதம்தோறும் ரூ.16,704-ஐ நிர்ணயித்து தமிழக அரசு கடந்த 2014-ஆம் ஆண்டு உத்தரவிட்டுள்ளது. அதன்படி விக்னேஷின் குடும்பத்துக்கு இழப்பீட்டுத் தொகையை ரூ.18 லட்சத்து 60 ஆயிரத்து 73-ஆக உயர்த்தி வழங்க உத்தரவிட்டார். இந்த தொகையை விபத்து நடந்த நாளில் இருந்து 12 சதவீத வட்டியுடன் சேர்த்து வழங்க உத்தரவிட்டு வழக்கை முடித்துவைத்து நீதிபதி உத்தரவிட்டார்.
மேலும், மத்திய அரசு கடந்த 2010 -ஆம் ஆண்டு தினக்கூலி தொழிலாளர்களுக்கு குறைந்தபட்ச மாத ஊதியமாக ரூ.8,000-த்தை நிர்ணயித்துள்ளது. ஆனால், மத்திய, மாநில அரசுகள் கடந்த 8 ஆண்டுகளில் ஏற்பட்டுள்ள விலைவாசி உயர்வை கருத்தில் கொள்ள தவறிவிட்டன. எனவே, தினக்கூலி தொழிலாளர்களின் குறைந்தபட்ச மாத ஊதியத்தை ஆண்டுக்கு ஒரு முறை ஏன் உயர்த்தக்கூடாது, தொழிலாளர்களுக்கான இழப்பீட்டுத் தொகையை ஏன் அதிகரிக்கக் கூடாது என்பது தொடர்பாக மத்திய, மாநில அரசுகள் பதிலளிக்க உத்தரவிட்டு, விசாரணையை வரும் டிசம்பர் 3 -ஆம் தேதிக்கு நீதிபதி கிருபாகரன் ஒத்திவைத்தார்.