ராமேசுவரம் மீனவர்கள் 19 பேர் யாழ்ப்பாணம் சிறையில் அடைப்பு

இலங்கை கடற்படையினரால் சிறைபிடிக்கப்பட்ட ராமேசுவரம் மீனவர்கள் 19 பேர் திங்கள்கிழமை யாழ்ப்பாணம் சிறையில் அடைக்கப்பட்டனர். 
ராமேசுவரத்தில் இருந்து சனிக்கிழமை மீன் பிடிக்கச் சென்றபோது 3 விசைப்படகுகளையும் அதில் இருந்த 19 மீனவர்களையும் இலங்கை கடற்படையினர் சிறைபிடித்தனர். கடற்படையினர் தாக்கியதில் மீனவர் ஒருவர் காயமடைந்தார். இந்நிலையில், எல்லை தாண்டி மீன்பிடித்ததாக வழக்குப் பதிவு செய்து திங்கள்கிழமை 11 பேரை ஊர்க்காவல்துறை நீதிமன்றத்தில் ஆஜர்படுத்தினர். அவர்களை வரும் 21 ஆம் தேதி வரை சிறையில் அடைக்க நீதிமன்றம் உத்தரவிட்டதையடுத்து, யாழ்ப்பாணம் சிறையில் அடைக்கப்பட்டனர். மேலும் 8 மீனவர்கள் கிளிநொச்சி நீதிமன்றத்தில் ஆஜர்படுத்தப்பட்டனர். அவர்களை வரும் 23-ஆம் தேதி வரை சிறையில் அடைக்க நீதிபதி உத்தரவிட்டதையடுத்து யாழ்ப்பாணம் சிறையில் அடைக்கப்பட்டனர்.