அவிநாசியில் டேங்கர் லாரி மீது கண்டெய்னர் லாரி மோதல்: ஓட்டுநர் பலி

அவிநாசி: அவிநாசி அருகே டேங்கர் லாரி மீது கண்டெய்னர் லாரி மோதி விபத்துக்குள்ளானதில், கண்டெய்னர் லாரி ஓட்டுநர் சம்பவயிடத்திலேயே உயிரிழந்தார்.

மங்களூரில் இருந்து தார் ஏற்றிக் கொண்டு டேங்கர் லாரி சென்னை நோக்கி சென்று கொண்டிருந்தது. சேலம்- கோவை புறவழிச்சாலை அவிநாசி ராக்கியாபாளையம் பிரிவு அருகே வரும்போது புதிய திருப்பூர் நோக்கிச் சென்ற கண்டெய்னர் லாரி, எதிர்பாராத விதமாக டேங்கர் லாரி மீது மோதி விபத்துக்குள்ளானது. 

இதில், கண்டெய்னர் லாரி ஓட்டுநர் நாகபட்டிணம் மாவட்டம், ஸ்ரீ வைத்தியம் பகுதியைச் சேர்ந்த கவியரசன்(25) பலத்த காயமடைந்து சம்பவயிடத்திலேயே உயிரிழந்தார். சேலம்-கோவை ஆறு வழிச்சாலையில் ஏற்பட்ட விபத்தால், போக்குவரத்து பாதிப்பிற்குள்ளானது.

போக்குவரத்தை சீரமைக்கும் பணியில் அவிநாசி காவல்துறையினர் ஈடுபட்டு வருகின்றனர். இதுகுறித்து வழக்குப்பதிவு செய்து விசாரணை மேற்கொண்டும் வருகின்றனர்.