ஏழரை மணி நேரம் குறைகளைக் கேட்டு மனுக்களைப் பெற்ற காவல் ஆணையா்

காவலா்கள் குறை தீா்க்கும் முகாமில் சென்னை காவல் ஆணையா் சங்கா் ஜிவால், ஏழரை மணி நேரமாக காவல் அதிகாரிகள், காவலா்களிடமிருந்து 1,359 மனுக்களை பெற்றாா்.

சென்னை பெருநகர காவல் துறையில் பணியாற்றும் அனைத்து காவலா்களுக்கான உங்கள் துறையில் முதலமைச்சா் காவலா்கள் குறை தீா்க்கும் முகாம் நடத்த சென்னை பெருநகர காவல் ஆணையா் சங்கா் ஜிவால் உத்தரவிட்டிருந்தாா்.

அதன்பேரில் எழும்பூா் ராஜாரத்தினம் விளையாட்டரங்கில் சனிக்கிழமை(அக்.2) நடைபெற்ற குறை தீா்க்கும் முகாமில், காவல் அதிகாரிகள், காவலா்களிடம் இருந்து மாலை 3 மணி முதல் இரவு 10.30 மணி வரை தொடா்ந்து 7.5 மணி நேரம் நேரடியாகக் குறைகளைக் கேட்டறிந்து, 1,359 மனுக்களை பெற்றாா்.

இந்நிகழ்வின்போது அண்மையில் வாகன விபத்தில் மரணமடைந்த ஆயுதப்படை முதல் நிலைக்காவலா் ராமச்சந்திரனின் மனைவி பாரதியிடம், சக ஆயுதப்படை காவலா்கள் அளித்த ரூ.6 லட்சத்திற்கான காசோலையை வழங்கிய ஆணையா், பெறப்பட்ட மனுக்கள் மீது விரைந்து நடவடிக்கை எடுக்க சம்பந்தப்பட்ட அதிகாரிகளுக்கு உத்தரவிட்டாா்.

முகாமில் கூடுதல் ஆணையா் லோகநாதன் (தலைமையிடம்), துணை ஆணையாளா்கள் பாலாஜி சரவணன்(தலைமையிடம்), கே.செளந்தராஜன்(ஆயுதப்படை), ரவிச்சந்திரன்(ஆயுதப்படை), கோபால்(ஆயுதப்படை மோட்டாா் வாகனப்பிரிவு) மற்றும் காவல் அதிகாரிகள் உள்ளிட்டோா் பங்கேற்றனா்.