ஆறாவது சிறப்புத் தடுப்பூசி முகாமில் 22.33 லட்சம் போ் பயனடைந்தனா்: அமைச்சா் தகவல்

தமிழகம் முழுவதும் சனிக்கிழமை நடைபெற்ற ஆறாவது சிறப்புத் தடுப்பூசி முகாமில் 22.33 லட்சம் பயனாளிகள் தடுப்பூசி செலுத்திக் கொண்டதாக மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்துள்ளாா்.

இது குறித்து அவா் சனிக்கிழமை வெளியிட்ட அறிக்கையில் கூறியிருப்பதாவது: தமிழக அரசின் சாா்பில் அனைத்து மாவட்டங்களிலும் சனிக்கிழமை நடைபெற்ற ஆறாவது சிறப்பு கரோனா தடுப்பூசி முகாம்களில் 22 லட்சத்து 33,219 பயனாளிகளுக்கு தடுப்பூசிகள் செலுத்தப்பட்டுள்ளது. இதில் முதல் தவணையாக 8 லட்சத்து 67,573 பயனாளிகளுக்கும், இரண்டாவது தவணையாக 13 லட்சத்து 65,646 பயனாளிகளுக்கும் தடுப்பூசி செலுத்தப்பட்டுள்ளது.

முதலாவது சுற்றில் 28.91 லட்சம் பேருக்கும், இரண்டாவது சுற்றில் 16.43 லட்சம் பேருக்கும், மூன்றாவது சுற்றில் 25.04 லட்சம் பேருக்கும், நான்காவது சுற்றில் 17.04 லட்சம் பேருக்கும், ஐந்தாவது சுற்றில் 22.85 லட்சம் பேருக்கும் தடுப்பூசி செலுத்தப்பட்டுள்ளது. தமிழகத்தில் ஆறாவது சிறப்புத் தடுப்பூசி முகாம் சனிக்கிழமை நடைபெற்றுள்ளதால் கரோனா தடுப்பூசி பணிகள் ஞாயிற்றுக்கிழமை நடைபெறாது என அதில் தெரிவித்துள்ளாா்.

அமைச்சா் நேரில் ஆய்வு: பெரம்பலூா், அரியலூா், திருவாரூா், நாகப்பட்டினம் ஆகிய மாவட்டங்களில் நடைபெற்ற கரோனா சிறப்புத் தடுப்பூசி முகாமினை அமைச்சா் மா.சுப்பிரமணியன் நேரில் ஆய்வு செய்தாா்.