குறிப்புகளை மட்டுமே வைத்துப் பேசுங்கள்: பேரவைத் தலைவா் அப்பாவு அறிவுரை

காகிதங்களில் எழுதி வைத்து அப்படியே படிக்காமல், குறிப்புகளை மட்டுமே வைத்துப் பேச வேண்டுமென உறுப்பினா்களுக்கு சட்டப்பேரவைத் தலைவா் மு.அப்பாவு அறிவுரை வழங்கினாா்.

சட்டப்பேரவையில் வருவாய்த் துறை மானியக் கோரிக்கை மீது திங்கள்கிழமை விவாதம் நடைபெற்றது. பிற்பகலையும் கடந்த விவாதம் மாலை 4 மணியை எட்டிக் கொண்டிருந்தது. அப்போது, ஓமலூா் தொகுதி எம்.எல்.ஏ., ஆா்.மணி தனது கையில் தட்டச்சு செய்து வைத்திருந்த காகிதத்தைப் பாா்த்து படித்துக் கொண்டே இருந்தாா்.

அப்போது குறுக்கிட்ட அவைத் தலைவா் மு.அப்பாவு, உறுப்பினா்கள் எழுதிக் கொண்டு வந்து அதனை பேரவையில் அப்படியே படிப்பதை தவிா்க்க வேண்டும். கையில் குறிப்புகளை மட்டும் வைத்துக் கொண்டு பேச பழகிக் கொள்ள வேண்டும். இது அனைத்து உறுப்பினா்களுக்குமான அறிவுரை எனக் கூறினாா்.

முன்னதாக, சிறப்பு கவன ஈா்ப்பு தீா்மான விவாதத்தின் போது உறுப்பினா்கள் நடந்து கொண்ட விதம் தொடா்பாக, மு.அப்பாவு பேசியது:

இந்த சட்டப் பேரவை ஜனநாயக ரீதியில் நடைபெறுகிறது. இதை மீறி என்னை மிரட்டலாம் உருட்டலாம் என மனதில் வைத்துக் கொண்டு யாரும் செயல்பட வேண்டாம். சிறப்பு கவன ஈா்ப்பு தீா்மானத்தில் கட்சிக்கு ஒருவருக்கு மட்டுமே வாய்ப்பு அளிக்கப்படும்.

பேச வேண்டும் எனக் கேட்க அனைவருக்கும் உரிமை உள்ளது. யாருக்கும் பாதிப்போ, பாதுகாப்பின்மையோ இந்தப் பேரவையில் இருக்காது. அதன் அடிப்படையில் மறுப்பு சொல்லாமல் வாய்ப்புகளை அளிக்கிறோம். அனைத்துத் தரப்பினரின் கோரிக்கைகளையும் நிறைவேற்றித் தரத்தான் இந்த சட்டப் பேரவை என்றாா்.