கறம்பக்குடி பேரூராட்சியில் ஒரு வாக்குகூட பெறாத அதிமுக வேட்பாளர்

ஆலங்குடி: புதுக்கோட்டை  மாவட்டம், கறம்பக்குடி பேரூராட்சி 7-வது வார்டில் போட்டியிட்ட அதிமுக வேட்பாளர் இப்ராகிம்ஷா ஒரு வாக்கு கூட பெறவில்லை.

அதே வார்டில் 5-க்கும் மேற்பட்ட குடும்ப உறுப்பினர்களுடன் வசித்து வந்தும் ஒரு வாக்கு  கூட பெறாதது அதிமுகவினரிடையே அதிர்ச்சியை ஏற்படுத்தியுள்ளது.

கறம்பக்குடி பேரூராட்சியில் மொத்தமுள்ள 15 வார்டுகள் 11 வார்டில் திமுக கூட்டணியும், அதிமுக, சுயேச்சைகள் தலா 2 இடத்திலும் வெற்றி பெற்றுள்ளனர். இந்நிலையில், அந்த பேரூராட்சியில் 7-வது வார்டில் திமுக சார்பில் ப.பரூக், அதிமுக சார்பில் முகமது இப்ராஹிம்ஷா, நாம்தமிழர், மார்சிஸ்ட் லெனினிஸ்ட், சுயேச்சைகள் உள்பட 6 பேர் போட்டியிட்டனர்.

இதையும் படிக்க | உள்ளாட்சித் தேர்தல் முடிவுகள்..உடனுக்குடன்

அதில், சுயேச்சையாக போட்டியிட்ட ப. பிரதிவிராஜா 175 வாக்குகள் பெற்று வெற்றி பெற்றார். ப.பரூக் 149 வாக்குகள் பெற்று இரண்டாவது இடத்தை பெற்றார். அதிமுக வேட்பாளரான முகமது இப்ராகிம்ஷாவிற்கு 1 வாக்கு கூட பதிவாகவில்லை.

அதே வார்டுக்கு உள்பட்ட பகுதியில் 5-க்கும் மேற்பட்ட குடும்ப உறுப்பினர்களுடன் வசித்துவரும் இவருக்கு, 1 வாக்கு கூட பதிவாகவில்லை என்பது புதுக்கோட்டை மாவட்ட அதிமுகவினரிடையே பெரும் அதிர்ச்சியை ஏற்படுத்தியுள்ளது.

இதே வார்டில் மார்க்சிஸ்ட் லெனினிஸ்ட் வேட்பாளர் க.தர்மராஜ் என்பவரும் 1 வாக்கு கூட பெறவில்லை என்பது குறிப்பிடத்தக்கது.