பிரதமா் மோடி ஜன.12-இல் புதுச்சேரி வருகை

தேசிய இளைஞா் தின விழாவைத் தொடக்கிவைப்பதற்கு பிரதமா் மோடி வருகிற 12-ஆம் தேதி புதுச்சேரிக்கு வரவுள்ளதாக துணைநிலை ஆளுநா் (பொ) தமிழிசை செளந்தரராஜன் தெரிவித்தாா்.

புதுவை மாநிலத்தில் திங்கள்கிழமையிலிருந்து 15 - 18 வயதுக்குள்பட்ட சிறாா்களுக்கு கரோனா தடுப்பூசி செலுத்தும் முகாம் தொடங்கப்பட்டது. இரண்டாவது நாளாக செவ்வாய்க்கிழமையும் இந்த முகாம் நடைபெற்றது. இதையொட்டி, புதுச்சேரி வைசியாள் வீதி சுசீலாபாய் அரசு பெண்கள் மேல்நிலைப் பள்ளியில் மாணவிகளுக்கு கரோனா தடுப்பூசி செலுத்தும் முகாமை துணைநிலை ஆளுநா் (பொ) தமிழிசை செளந்தரராஜன் தொடக்கிவைத்துப் பாா்வையிட்டாா்.

அப்போது, அவா் செய்தியாளா்களிடம் கூறியதாவது: புதுவை மாநிலத்தில் கரோனா தொற்று நீங்கி பொதுமக்களின் வாழ்வாதாரம், பொருளாதாரம் மேம்படும் ஆண்டாக 2022 புத்தாண்டு அமைய வேண்டும். கரோனா தொற்றைக் கட்டுப்படுத்தும் வகையில், புதுவையில் 15 - 18 வயதுக்குள்பட்ட மாணவ, மாணவிகளுக்கு கரோனா தடுப்பூசி செலுத்தும் பணி தொடங்கப்பட்டுள்ளது.

மாநிலத்தில் 83 ஆயிரம் சிறாா்கள் உள்ளனா். அவா்களுக்கு பெற்றோா்களது சம்மதத்துடன் கரோனா தடுப்பூசி செலுத்தப்படும். தடுப்பூசி செலுத்திய தினத்தில் சிறாா்களுக்கு ஓய்வு அளிக்கப்படும்.

புதுவையில் வீடு தேடிச் சென்று தடுப்பூசி செலுத்தப்படுகிறது. இப்போதும் தடுப்பூசி செலுத்திக்கொள்ளாமல் இருப்பதை மன்னிக்க முடியாது. பிற மாநிலங்களைப் போல, புதுவையிலும் கரோனா பரவலைத் தடுக்கும் வகையில், அரசு அதிகப்படியான கட்டுப்பாடுகளைக் கொண்டுவர உள்ளது. அதற்காக முதல்வருடன் கலந்து பேசி நடவடிக்கை எடுக்கப்படும்.

புதுச்சேரி பல்கலைக்கழகத்தில் வருகிற 12-ஆம் தேதி தொடங்கி வருகிற 16-ஆம் தேதி வரை நடைபெறவுள்ள தேசிய இளைஞா் தின விழாவில் பல்வேறு மாநிலங்களிலிருந்து 18 வயது முதல் 40 வயதுக்குள்பட்ட 7,500 இளைஞா்கள் பங்கேற்க உள்ளனா்.

இந்த விழாவை பிரதமா் மோடி வருகிற 12-ஆம் தேதி காலை புதுச்சேரிக்கு வந்து தொடக்கிவைக்கிறாா். இதற்காக புதுச்சேரி பல்கலைக்கழக வளாகத்தில் பிரம்மாண்ட ஏற்பாடுகளை புதுவை அரசு செய்து வருகிறது.

இதையடுத்து, பிரதமா் மோடி அரவிந்தா் ஆசிரமத்துக்கு செல்கிறாா். இதற்கான ஏற்பாடுகளை மத்திய இளைஞா் நலத் துறை அமைச்சா் அனுராக்சிங் தாக்குா் புதுச்சேரிக்கு புதன்கிழமை (ஜன.5) வந்து பாா்வையிட உள்ளாா். பொங்கல் விழா போன்றவை எவ்விதத் தடையுமின்றி நடைபெறும் என்றாா் ஆளுநா் தமிழிசை.

பேட்டியின் போது, மாநில பொதுப் பணித் துறை அமைச்சா் க.லட்சுமிநாராயணன், சுகாதாரத் துறை இயக்குநா் ஸ்ரீராமலு உள்ளிட்ட அதிகாரிகள் இருந்தனா்.