சமூக நீதி, சமத்துவம் ஆட்சியின் தத்துவமாகவும் மாற வேண்டும்: முதல்வா் மு.க.ஸ்டாலின்

சமூகநீதி, சமத்துவம், சகோதரத்துவம் ஆகியவை அரசியல் தத்துவமாக மட்டுமல்லாமல், ஆட்சியின் தத்துவமாகவும் மாற வேண்டும் என்று முதல்வா் மு.க.ஸ்டாலின் கூறினாா்.

சென்னை குருநானக் கல்லூரியில் தமிழ்நாடு மாநில சிறுபான்மையினா் ஆணையத்தின் சாா்பில் கருணாநிதி பிறந்த நாள் விழா வெள்ளிக்கிழமை நடைபெற்றது.

விழாவில் அனைத்துக் கல்லூரி மாணவ, மாணவியருக்கான பேச்சுப் போட்டியில் வெற்றி பெற்றவா்களுக்கு பரிசுகள் வழங்கி முதல்வா் மு.க.ஸ்டாலின் பேசியது:

திமுக ஆட்சி அமைந்ததுமே தமிழகம் தலைநிமிரத் தொடங்கிவிட்டது. இதனைக் கண்கூடாக மக்கள் பாா்த்து கொண்டிருக்கின்றனா். இந்த நிலையில், ‘தலைநிமிரும் தமிழகம்’ என்ற தலைப்பில் மாணவா்களுக்கு தமிழில் மட்டுமல்ல, ஆங்கிலத்திலும் பேச்சுப் போட்டி நடத்தியிருப்பது இன்றைய காலகட்டத்துக்கு மிக முக்கியமானது ஆகும்.

இப்போட்டியில் கலந்து கொண்ட மாணவா்களைப் பாா்க்கும் போது, நான் என்னுடைய கல்லூரி காலத்துக்குச் சென்று விட்டேன். 1971-இல் தமிழகத்தில் ஹிந்தி திணிக்கப்படக்கூடிய சூழ்நிலை ஏற்பட்ட காலத்தில், கோவையில் திமுகவின் மாணவா் மாநாடு நடைபெற்றது. கருணாநிதியும் கலந்து கொண்டாா். அந்த மாநாட்டின் தலைவா் தஞ்சையைச் சோ்ந்த எல்.கணேசன். அவரிடம் சென்று 2 நிமிஷங்கள் பேசுவதற்கு அனுமதி கேட்டேன். அனுமதி தந்தாா். நான் பேசும்போது, ஹிந்தி திணிக்கப்படுகிற முயற்சி நடக்கிறது. ஹிந்தியை எதிா்த்துப் போராடும் மாணவா் பட்டாளத்தில் தியாகம் செய்யக்கூடிய பட்டியலாக இருந்தால் என்னை சோ்த்துக் கொள்ளுங்கள். என்னுடைய தந்தைக்கு நான்கு ஆண் பிள்ளைகள். ஒரு பிள்ளை போய்விடுவதால் என்னுடைய தந்தை நிச்சயம் கவலைப்பட மாட்டாா். மொழிக்காக, இனத்துக்காக தனயனை இழந்த தந்தை என்று அவரை நாடு பாராட்டும், போற்றும். அந்தப் பெருமையை வாங்கித் தந்த பெருமை எனக்கு சேரும் என்று முழங்கினேன். அப்போது எழுந்த கரவொலி இப்போதும் என் காதுகளில் ரீங்காரமிட்டு கொண்டு இருக்கிறது.

1970-இல் கருணாநிதி லண்டனில் உள்ள ஹைட் பாா்க் என்ற இடத்துக்குச் சென்றிருக்கிறாா். அந்த பூங்கா என்பது பேச்சாளா்கள் பயிற்சி பெறும் இடமாக இருந்ததாம். அதைப் போய் பாா்த்திருக்கிறாா். அது போன்ற பயிற்சிப் பாசறைகளை உருவாக்கும் சூழ்நிலையை நாம் ஏற்படுத்த வேண்டும்.

சமூகநீதி, சமத்துவம், சகோதரத்துவம், மனிதநேயம், மதச்சாா்பற்ற தன்மையும் கொண்ட இந்தியாதான் மக்களாட்சியின் இந்தியாவாக இருக்க முடியும். இவை அரசியல் தத்துவங்கள் மட்டுமல்ல - ஆட்சியின் தத்துவமாக மாற வேண்டும். இந்த அடித்தளம் கொண்டதாகத்தான் திராவிட மாடல் ஆட்சியானது தமிழகத்தில் நடைபெற்று வருகிறது.

திராவிட மாடல் என்பது எதையும் இடிக்காது; உருவாக்கும். திராவிட மாடல் என்பது எதையும் சிதைக்காது; சீா் செய்யும். யாரையும் பிரிக்காது; அனைவரையும் ஒன்று சோ்க்கும். யாரையும் தாழ்த்தாது; அனைவரையும் சமமாக நடத்தும். அத்தகைய அடிப்படையில்தான் இந்த திராவிட மாடல் ஆட்சி நடைபெற்று வருகிறது.

இந்த தத்துவத்தைப் பயிற்றுவிக்கும் பாசறையாகவே மாநிலச் சிறுபான்மையினா் ஆணையம் திகழ்வதை நினைத்து நான் மகிழ்ச்சி அடைகிறேன். அனைத்துத் துறைகளும் இது போன்று மாணவச் செல்வங்களுக்கு பேச்சுப் பயிற்சி தருமானால் தமிழகத்துக்கு ஏராளமான பேச்சாளா்கள் கிடைப்பாா்கள் என்பதில் சந்தேகமில்லை என்றாா்.

அமைச்சா்கள் கே.என்.நேரு, பொன்முடி, மா.சுப்பிரமணியன், செஞ்சி கே.எஸ்.மஸ்தான், தமிழ்நாடு சிறுபான்மையினா் ஆணையத் தலைவா் பீட்டா் அல்போன்ஸ், மனிதநேய மக்கள் தலைவா் ஜவாஹிருல்லா உள்பட பலா் பங்கேற்றனா்.