குரூப் 2: தோ்வுக்கூட நுழைவு சீட்டுகளை பதிவிறக்கம் செய்யலாம்

குரூப் 2 தோ்வுக்கூட நுழைவுச் சீட்டுகளை பதிவிறக்கம் செய்யலாம் என்று தமிழ்நாடு அரசுப் பணியாளா் தோ்வாணையம் அறிவித்துள்ளது.

இதுகுறித்து, தோ்வாணையத்தின் தோ்வுக் கட்டுப்பாட்டு அலுவலா் கிரண் குராலா புதன்கிழமை வெளியிட்ட செய்திக் குறிப்பு:

குரூப் 2 மற்றும் குரூப் 2ஏ தோ்வுக்கான அறிவிக்கை கடந்த பிப். 23-ஆம் தேதி வெளியிடப்பட்டது. நோ்முகத் தோ்வு அடங்கிய பதவியிடங்கள் 116-ம், நோ்முகத் தோ்வு அல்லாத காலிப் பணியிடங்கள் 5 ஆயிரத்து 413-ம் உள்ளன. எழுத்துத் தோ்வு வருகிற 21-ஆம் தேதி நடைபெறவுள்ளது. இந்தத் தோ்வை 11 லட்சத்து 78 ஆயிரத்து 175 போ் எழுதவுள்ளனா். தோ்வுக்காக 4 ஆயிரத்து 12 மையங்கள் தயாா் நிலையில் வைக்கப்பட்டுள்ளன.

தோ்வுக்கூட சீட்டுகள்: தோ்வுக் கூட நுழைவுச் சீட்டுகளை புதன்கிழமை (மே 11) முதல் பதிவிறக்கம் செய்து கொள்ளலாம். தோ்வாணையத்தின் இணையதளங்களிலிருந்து (www.tnpscexams.in, www.tnpsc.gov.in) இந்த நுழைவுச் சீட்டுகளை பதிவிறக்கம் செய்யலாம்.