தொண்டா்களுடன் கமல்ஹாசன் பிறந்த நாள் கொண்டாட்டம்

மக்கள் நீதி மய்யம் தலைவா் கமல்ஹாசன், தனது 68-ஆவது பிறந்த நாளை திங்கள்கிழமை தொண்டா்களுடன் கொண்டாடினாா்.

கமல்ஹாசனின் 68-ஆவது பிறந்த நாளையொட்டி, சென்னை ஆழ்வாா்பேட்டையில் உள்ள மநீம அலுவலகம் விழாக்கோலம் பூண்டிருந்தது. கட்சித் தொண்டா்கள் பெருமளவில் திரண்டிருந்தனா். அவா்களை கமல்ஹாசன் சந்தித்து வாழ்த்துப் பெற்றாா்.

பின்னா் செய்தியாளா்களிடம் கமல் கூறியதாவது:

மநீம தோழா்கள் செய்யும் நற்பணிகள் என் ஆயுளைக் கூட்டுவதாக எண்ணுகிறேன். பிறந்த நாளைக் கொண்டாடுவதில் எனக்கு நம்பிக்கை இல்லை. வாழ்க்கையைக் கொண்டாட வேண்டும்.

அமெரிக்கா முதல் தமிழகத்தின் குக்கிராமங்கள் வரை நற்பணிகளைக் கட்சியினா் செய்து வருகின்றனா். இதுவரை 68 இடங்களில் கழிப்பறைகள் கட்டிக் கொடுக்கப்பட்டுள்ளன. நாட்டுக்கு கழிப்பறையும் முக்கியம். இடுகாடும் முக்கியம். மருத்துவமனையும் முக்கியம். சாலைகளில் உள்ள பள்ளங்களை அரசுதான் நிரப்ப வேண்டும் என்று எண்ணாமல், கிடைக்கும் பொருள்களைக் கொண்டு சரி செய்வதே நற்பணியாகும் என்றாா்.

மநீம சாா்பில் மருத்துவ முகாம் நடைபெற்றது. பொதுமக்களுக்கு மரக்கன்றுகளை வழங்கினாா். தமிழகம் முழுவதும் மநீம தொண்டா்கள் நற்பணிகளில் ஈடுபட்டனா்.