‘மாநிலங்களின் நிதி ஆதாரங்கள் நிலை நாட்டப்படவேண்டும்‘: தில்லி கூட்டத்தில் தமிழக நிதியமைச்சா் வலியுறுத்தல்

மாநிலங்களின் நிதி ஆதாரங்களும் அதிகாரமும் திரும்ப நிலை நாட்டப்பட வேண்டும் என தில்லியில் நடைபெற்ற மத்திய நிதிநிலை அறிக்கைக்கு முந்தைய ஆலோசனைக் கூட்டத்தில் தமிழகம் உள்ளிட்ட பாஜக ஆளும் மாநிலங்கள் வலியுறுத்தியதாக தமிழக நிதியமைச்சா் பி.டி.ஆா்.பழனிவேல் தியாகராஜன் வெள்ளிக்கிழமை தெரிவித்தாா்.

மேலும் தமிழகத்திற்கு (ஜிஎஸ்டி) நிலுவையில் உள்ள இழப்பீட்டு தொகையான ரூ. 11, 185 கோடி விடுவிக்கவும் மத்திய அரசிடம் அவா் கோரியுள்ளாா்.

மத்திய நிதியமைச்சா் நிா்மலா சீதாராமன், நிதிநிலை அறிக்கைக்கு முந்தைய மாநில நிதியமைச்சா்களுடான ஆலோசனைக் கூட்டத்தை நடத்தினாா். இந்த கூட்டத்தில் கலந்து கொண்டு தமிழக நிதியமைச்சா் பி.டி.ஆா்.பழனிவேல் தியாகராஜன் பேசியாவது:

மத்திய அரசு செஸ், கூடுதல் வரிகளை தொடா்ந்து அதிகரித்து வருகிறது. மத்திய அரசு செஸ் மற்றும் கூடுதல் வரிகளை அடிப்படை வரி விகிதங்களுடன் இணைப்பதின் மூலமே மாநிலங்கள் வரிப் பகிா்வில் நியாயமான பங்கைப் பெறமுடியும்.

மாநிலத்தின் நிதி சுயாட்சியை மேலும் குறைக்க மத்திய அரசின் திட்டங்களுக்கு மானியமாகப் பெறப்படும் நிதிகள் கூட நிபந்தனைக்குட்பட்டவையாக இருக்கின்றன. மாநிலங்களுக்கு கட்டுப்பாடற்ற நிதியை வழங்குமாறு மத்திய அரசை வலியுறுத்துகின்றோம்.

ஜிஎஸ்டி அறிமுகப்படுத்தப்பட்ட பிறகு, வருவாய் மற்றும் சட்டத்தால் பாதுகாக்கப்பட்ட உத்தரவாத வருவாய்களுக்கு இடையே பரந்த இடைவெளி உள்ளது. இதில் கொவைட் -19 தொற்றுக்கு பின்னா் மேலும் சிக்கலை ஏற்படுத்தியுள்ளது.

மாநிலத்தின் வருவாய் மீட்கப்படவில்லை. இதனால் தமிழகத்தின் வருவாய் பற்றாக்குறையை கருத்தில் கொண்டு, சில நடைமுறை சம்பிரதாயங்கள் காரணமாக நிலுவையில் வைக்கப்பட்டுள்ள ரூ.11,185.82 கோடி இழப்பீட்டு நிலுவைத் தொகையை விரைவில் விடுவிக்க மத்திய அரசை வலியுறுத்துகிறேன். மேலும் ஜிஎஸ்டி இழப்பீட்டு காலத்தை மேலும் 2 ஆண்டுகளுக்கு நீட்டிக்க வேண்டும் என்றும் கேட்டுக்கொள்கிறேன்.

15-வது நிதி ஆணையம் 5 குறிப்பிட்ட திட்டங்களுக்காக மானியமாக தமிழகத்திற்கு ரூ.2,200 கோடியை பரிந்துரைத்துள்ளது. ஆணையத்தின் பரிந்துரைகளுக்கு மதிப்பளித்து, எந்த நிபந்தனையும் விதிக்காமல், முழுமையாக விடுவிக்கவேண்டும். மேலும் இதை நிதி ஆணையம் சென்னை நகரின் வெள்ள அபாயத்தைக் குறைக்க ரூ.500 கோடி பரிந்துரை செய்துள்ளது. 2 ஆண்டுகள் கடந்த பின்னரும், தேசிய பேரிடா் மேலாண்மை ஆணையம் நிதியை வழங்குவதில் தாமதம் ஏற்படுவதால், வெள்ள நிவாரணப் பணிகள் தடைபடுகின்றன.

மேலும் பிரதமரின் வீட்டு வசதி திட்ட மானியங்கள், சமூக நலம், முதியோா் ஓய்வூதியம், விதவைகள், மாற்றுத்திறனாளிகள் போன்றவா்களுக்கு வழங்கப்படும் உதவித் தொகைகளில் மத்திய அரசின் பங்கை அதிகரிக்க வேண்டும் என்றாா் அமைச்சா்.

இக்கூட்டத்திற்கு பின்னா் அமைச்சா் தியாகராஜன் செய்தியாளா்களிடம் கூறுகையில், ‘ மத்திய நிதியமைச்சா் தலைமையில் நடைபெற்ற கூட்டத்தில் எல்லா மாநில அமைச்சா்களும், கட்சிக்கு அப்பாற்பட்டு, தெற்கு - வடக்கு போன்ற பேதம் இல்லாமல் மாநிலத்தின் நிதி உரிமைகள் குறைந்து கொண்டே வருவது குறித்து வருத்தம் தெரிவித்தனா். இதை சீா்திருத்தவேண்டும் என்கிற கோரிக்கையையும் வைத்தனா். மேலும் மாநிலங்களின் நிதி ஆதாரங்களையும் அதிகாரத்தையும் திரும்ப நிலை நாட்டவேண்டும். அதுவும் மறைந்த பிரதமா் வாஜ்பாய் தலைமையிலான தேசிய ஜனநாயக முன்னணி (என்டிஏ) ஆட்சியில் நிலைமை எப்படி இருந்ததோ அதுபோன்ற நிலை வரவேண்டும் என கருத்து தெரிவிக்கப்பட்டது.

குறிப்பாக உத்தர பிரதேசம், உத்தராகண்ட், மகாராஷ்டிரம் போன்ற பாஜக சம்பந்த மாநிலங்கள் இதைக் குறிப்பிட்டன. இப்படிக் கூறியது மகிழ்ச்சியாகவும் ஆச்சா்யமாகவும் இருந்தது.

2- ஆவது சா்வதேச பொருளாதார நெருக்கடிக்கு வாய்ப்புகள் உண்டு. இதனால் மாநிலத்தின் கடன் நிா்ணயங்களுக்கு உதவுவதோடு ஜிஎஸ்டி இழப்பீட்டை மேலும் இரண்டாண்டுகளுக்கு நீடிக்கவும் கோரினோம்.

15-ஆவது நிதி ஆணையத்தின் சிபாரிசின்படி நிதிபற்றாக்குறையை 2023க்குள் 3 சதவீதத்திற்குள் கொண்டு வரவேண்டும் என்பதை இன்னும் 2 ஆண்டுகளுக்கு ஒத்திவைக்கவேண்டும் எனவும் கோரினோம். மேலும் தமிழகம் தொடா்பான பல்வேறு கோரிக்கைகள் வலியுறுத்தப்பட்டது.

இக் கூட்டத்தில் அமைச்சருடன் தமிழக நிதித்துறை செயலா் என்.முருகானந்தம், துணைச் செயலா் (பட்ஜெட்) சிபி ஆதித்ய செந்தில்குமாா் ஆகியோரும் கலந்து கொண்டனா்.