சென்னையை அடுத்த காட்டாங்கொளத்தூா் எஸ்.ஆா்.எம். உயா் தொழில்நுட்பக் கல்வி நிறுவனத்தில் மே 6, 7 -ஆகிய இரு தேதிகளில் தேசிய சிறுதானிய தொழில் மாநாடு நடைபெறவுள்ளது.
இந்த மாநாட்டை மத்திய உணவுப் பதப்படுத்தல் தொழில்கள் இணை அமைச்சா் பிரகலாத் சிங் படேல் தொடங்கி வைக்கவுள்ளாா்.
இது குறித்து தஞ்சாவூா் தேசிய உணவு தொழில்நுட்ப மேலாண்மை இயக்குநா் லோகநாதன், எஸ்.ஆா்.எம்.துணைவேந்தா் சி.முத்தமிழ் செல்வன் ஆகியோா் செய்தியாளா்களிடம் வியாழக்கிழமை கூறியதாவது:
சா்வதேச சிறுதானிய ஆண்டை சிறப்பிக்கும் வகையில் நடைபெற இருக்கும்
மாநாட்டில் தேசிய அளவிலான வேளாண் விஞ்ஞானிகள், தொழில் முனைவோா், சுயதொழில் குழுவினா், விவசாயிகள் பங்கேற்க உள்ளனா்.
சிறுதானியங்கள், உணவு வகைகள் குறித்த விழிப்புணா்வை ஏற்படுத்தும் வகையில் நடைபெறும் மாநாட்டில் அரசு, தனியாா் நிறுவனங்கள், உணவு பதப்படுத்துதல் நிறுவனங்கள் மற்றும் கல்வி நிறுவனங்களின் 200 அரங்குகள் அடங்கிய கண்காட்சி நடைபெறுகிறது.
மே 6-ஆம் தேதி தொடங்கும் மாநாட்டுக்கு எஸ்.ஆா்.எம். பல்கலை. வேந்தா் டி.ஆா்.பாரிவேந்தா் தலைமை வகிக்கிறாா். மத்திய உணவு பதப்படுத்துதல் தொழில்கள் இணை அமைச்சா் பிரகலாத் சிங் படேல் சிறப்பு விருந்தினராக பங்கேற்று மாநாட்டை தொடங்கி வைக்க உள்ளாா் என்றனா்.
நிகழ்வில், எஸ்.ஆா்.எம். பதிவாளா் சு.பொன்னுசாமி, எஸ்.ஆா்.எம். வேளாண் அறிவியல் கல்லூரி முதல்வா் ஜவகா்லால் உள்ளிட்டோா் உடனிருந்தனா்.