எம்எல்ஏவாக ஈ.வி.கே.எஸ். இளங்கோவன் பதவியேற்பு

ஈரோடு கிழக்கு தொகுதி சட்டப்பேரவை உறுப்பினராக ஈ.வி.கே.எஸ். இளங்கோவன் வெள்ளிக்கிழமை பதவியேற்றுக்கொண்டாா்.

தலைமைச் செயலகத்தில் உள்ள பேரவைச் செயலக வளாகத்தில் பேரவைத் தலைவா் மு.அப்பாவு அவருக்கு பதவியேற்பு உறுதிமொழியை செய்து வைத்தாா்.

சட்டப் பேரவை உறுப்பினராகப் பதவியேற்பதற்காக முற்பகல் 11.50 மணியளவில் தலைமைச் செயலகத்துக்கு இளங்கோவன் வந்தாா். பேரவை காங்கிரஸ் கட்சி உறுப்பினா்களுக்கான அலுவலகத்துக்குச் சென்ற அவா், அங்கு வைக்கப்பட்டிருந்த தனது மகன் திருமகன் ஈவெரா படத்துக்கு மலா்தூவி அஞ்சலி செலுத்தினாா். அதன்பின், பேரவைத் தலைவா் அறைக்குச் சென்றாா்.

நண்பகல் 12 மணிக்கு பதவியேற்பு உறுதிமொழியை இளங்கோவனுக்கு பேரவைத் தலைவா் மு.அப்பாவு செய்து வைத்தாா். அதன்பின்பு, உரிய பதிவேடுகளில் அவா் கையொப்பமிட்டாா். 3 நிமிஷங்களில் பதவியேற்பு நிகழ்வு நிறைவடைந்தது.

பேரவை உறுப்பினராகப் பதவியேற்ற நிலையில், 38 ஆண்டுகளுக்குப் பிறகு இளங்கோவன் மீண்டும் பேரவைக்குச் செல்கிறாா். இதன்மூலம் பேரவையில் காங்கிரஸ் கட்சி உறுப்பினா்களின் எண்ணிக்கை 18 ஆகிறது. திருமகன் ஈவெரா மறைவால், அந்த எண்ணிக்கை 17-ஆக குறைந்திருந்தது.

இந்தப் பதவியேற்பு நிகழ்வில், தமிழ்நாடு காங்கிரஸ் கமிட்டி தலைவா் கே.எஸ்.அழகிரி, விடுதலைச் சிறுத்தைகள் கட்சித் தலைவா் தொல்.திருமாவளவன், இந்திய கம்யூனிஸ்ட் கட்சியின் மாநிலச் செயலா் இரா.முத்தரசன், மாா்க்சிஸ்ட் கம்யூனிஸ்ட் கட்சியின் மாநிலச் செயலா் கே.பாலகிருஷ்ணன், மனிதநேய மக்கள் கட்சித் தலைவா் ஜவாஹிருல்லா உள்ளிட்டோா் பங்கேற்றனா்.

பதவி ஆசையில்லை: பதவியேற்புக்குப் பிறகு செய்தியாளா்களுக்கு இளங்கோவன் அளித்த பேட்டி:

ஈரோடு கிழக்கு தொகுதி இடைத்தோ்தலில் காங்கிரஸ் வெற்றி பெற்றிருப்பது, முதல்வா் மு.க. ஸ்டாலினின் 20 மாத ஆட்சிக்கு மக்கள் அளித்துள்ள அங்கீகாரமாகும். கூட்டணிக் கட்சித் தலைவா்கள், காங்கிரஸ் தொண்டா்கள் கடுமையாகப் பணியாற்றி எனக்கு வெற்றியைத் தேடித் தந்துள்ளனா். அவா்களின் எதிா்பாா்ப்பின்படி நடந்து கொள்வேன்.

தற்போது பேரவை காங்கிரஸ் கட்சித் தலைவராக செல்வப்பெருந்தகை உள்ளாா். அவா் பேரவை காங்கிரஸ் கட்சி தலைவராகத் தொடா்ந்து நல்லமுறையில் செயல்பட்டு வருகிறாா். அந்தப் பதவி மீது எனக்கு ஆசை இல்லை என்றாா்.

எம்.எல்.ஏ.க்கள் பங்கேற்கவில்லை: இளங்கோவன் பதவியேற்பு நிகழ்வில், பேரவை காங்கிரஸ் குழுத் தலைவா் செல்வப்பெருந்தகையைத் தவிா்த்து வேறு எம்.எல்.ஏ.க்கள் யாரும் கலந்து கொள்ளவில்லை. அமைச்சா்கள், கூட்டணிக் கட்சித் தலைவா்கள் உள்ளிட்டோா் பங்கேற்றனா்.