இளைஞா் கொலை வழக்கு: மேலும் ஒருவா் கைது

சென்னை துரைப்பாக்கத்தில் இளைஞா் கொலை செய்யப்பட்ட வழக்கில், மேலும் ஒருவா் கைது செய்யப்பட்டாா்.

நீலாங்கரை, சிவன் கோவில் தெருவைச் சோ்ந்தவா் முருகன் (எ) கண்மூடி முருகன் (20). இவா், துரைப்பாக்கம் மேட்டுக்குப்பம், வெங்கடேஸ்வரா அவென்யூவில் புதிதாக கட்டப்படும் கட்டடத்தில் கடந்த 8-ஆம் தேதி கொலை செய்யப்பட்டு கிடந்தாா்.

இது குறித்து துரைப்பாக்கம் போலீஸாா் வழக்குப் பதிவு செய்து, விசாரணை நடத்தி வந்தனா். விசாரணையில், கஞ்சா வியாபாரப் போட்டியில் முருகன் கொலை செய்யப்பட்டிருப்பது தெரிய வந்தது.

இதையடுத்து, இந்த வழக்குத் தொடா்பாக, துரைப்பாக்கம் சுப்புராயன் நகரைச் சோ்ந்த ரெளடி அபினேஷ் உள்பட 7 போ் கடந்த வியாழக்கிழமை கைது செய்யப்பட்டனா்.

இந்த வழக்குத் தொடா்பாக தேடப்பட்டு வந்த துரைப்பாக்கம் மேட்டுக்குப்பத்தைச் சோ்ந்த ரா.விக்னேஷ் (28) வெள்ளிக்கிழமை கைது செய்யப்பட்டாா். அவரிடம் போலீஸாா் விசாரணை நடத்தி வருகின்றனா்.