நீண்ட கால நண்பரை இழந்துவிட்டேன் என்று நடிகர் ரஜினிகாந்த் தெரிவித்துள்ளார்.
அகில இந்திய ரஜினிகாந்த் ரசிகர் நற்பணி மன்றத் தலைமை நிர்வாகி வி.எம்.சுதாகர் உடல்நலக்குறைவால் இன்று(வெள்ளிக்கிழமை) காலமானார். அவருக்கு வயது 71. இவர் நீண்ட நாள்களாக உடல்நலக்குறைவால் பாதிக்கப்பட்டு சிகிச்சை பெற்று வந்த நிலையில் சிகிச்சை பலனின்றி இன்று காலை உயிரிழந்தார். அவரது மறைவுக்கு ரஜினி ரசிகர் நற்பணி மன்றம் இரங்கல் தெரிவித்துள்ளது.
இதையும் படிக்க- சோனியா காந்தி உடல்நிலை குறித்து மருத்துவமனை தகவல்
அத்துடன் ரஜினி ரசிகர்கள் பலரும் அவருக்கு இரங்கல் தெரிவித்து வருகின்றனர். இந்த நிலையில் ரஜினி ரசிகர் மன்ற மாநில நிர்வாகி சுதாகர் உடலுக்கு நடிகர் ரஜினிகாந்த் நேரில் அஞ்சலி செலுத்தினார். அஞ்சலிக்குப் பின் செய்தியாளர்களிடம் ரஜினி கூறியதாவது, சுதாகர் எனது நீண்ட கால நண்பர்; நல்ல நண்பரை இழந்துவிட்டேன். இவ்வாறு அவர் குறிப்பிட்டார்.
முன்னதாக சுதாகர் மறைவு குறித்து நடிகர் ரஜினிகாந்து தனது ட்விட்டர் பக்கத்தில், 'என்னுடைய அருமை நண்பர் வி.எம்.சுதாகர் நம்மை விட்டுப் பிரிந்தது எனக்கு மிகவும் வருத்தமளிக்கிறது. அவரை இழந்து வாடும் அவருடைய குடும்பத்தினருக்கும் மற்றும் அனைவருக்கும் என் ஆழ்ந்த அனுதாபங்கள். அவர் ஆத்மா சாந்தியடையட்டும்' என்று பதிவிட்டுள்ளார்.