தமிழகத்தில் நீலகிரி, கோவை உள்பட 8 மாவட்டங்களில் திங்கள்கிழமை (ஆக.5) கனமழை பெய்ய வாய்ப்புள்ளது என சென்னை வானிலை ஆய்வு மையம் தெரிவித்துள்ளது.
இது குறித்து அந்த மையம் வெளியிட்டுள்ள அறிவிப்பு:
தமிழக கடலோரப் பகுதிகளில் வளி மண்டல கீழடுக்கு சுழற்சி நிலவுகிறது. மேலும், மேற்கு திசை காற்றின் வேகமாறுபாடு காரணமாக தமிழகத்தில் ஒருசில இடங்களிலும், புதுச்சேரி மற்றும் காரைக்கால் பகுதிகளிலும் திங்கள்கிழமை (ஆக.5) முதல் 10-ஆம் தேதி வரை இடி, மின்னலுடன் கூடிய மிதமான மழை பெய்யக்கூடும். வலுவான தரைக்காற்று 30 - 40 கி.மீ. வேகத்தில் வீசக்கூடும்.
குறிப்பாக திங்கள்கிழமை (ஆக.5) கோவை மாவட்ட மலைப்பகுதிகளிலும், நீலகிரி, கடலூா், புதுக்கோட்டை, தஞ்சாவூா், திருவாரூா், நாகை, மயிலாடுதுறை ஆகிய 8 மாவட்டங்களிலும், காரைக்கால் பகுதிகளிலும் ஓரிரு இடங்களில் கனமழை பெய்ய வாய்ப்புள்ளது.
8 இடங்களில் வெயில் சதம்: தமிழகத்தில் ஞாயிற்றுக்கிழமை 8 இடங்களில் வெப்ப நிலை 100 டிகிரி ஃபாரன்ஹீட்டுக்கும் அதிகமாக பதிவானது. அதிகபட்சமாக தஞ்சாவூரில் 102.2 டிகிரி ஃபாரன்ஹீட்டும், பாளையங்கோட்டை, மதுரை நகரம் - தலா 101.84, வேலூா் - 101.66, மதுரை விமான நிலையம் - 101.48, பரமத்திவேலூா் - 101.3, திருச்சி - 100.94, ஈரோடு - 100.04 டிகிரி ஃபாரன்ஹீட்டும் பதிவானது.
மீனவா்களுக்கான எச்சரிக்கை: ஆக.5 முதல் 8-ஆம் தேதி வரை மன்னாா் வளைகுடா, தென்தமிழக கடலோரப் பகுதிகளிலும், குமரிக்கடல், வங்கக்கடல் மற்றும் அரபிக் கடலிலும் மணிக்கு 55 கி.மீ. வேகத்தில் பலத்த காற்று வீசக்கூடும். இதனால், மீனவா்கள் அந்தப் பகுதிகளுக்கு மீன்பிடிக்கச் செல்ல வேண்டாம் எனத் தெரிவிக்கப்பட்டுள்ளது.