ஃபாா்முலா 4 காா் பந்தயம்: பாா்வையாளா்களுக்கு கடும் கட்டுப்பாடுகள்; தடை செய்யப்பட்ட பொருள்கள் பட்டியல் வெளியீடு

சென்னையில் நடைபெறவுள்ள ஃபாா்முலா காா் பந்தயத்தை பாா்வையிட வருவோருக்கு கடும் கட்டுப்பாடுகள் விதிக்கப்பட்டுள்ளன. பாா்வையாளா்கள் எடுத்து வர தடை செய்யப்பட்ட பொருள்கள் விவரங்களையும் தமிழக அரசு வெளியிட்டுள்ளது.

தமிழ்நாடு விளையாட்டு மேம்பாட்டு ஆணையம் புதன்கிழமை வெளியிட்ட செய்திக் குறிப்பு: சென்னையில் ஃபாா்முலா காா் பந்தயம் வரும் சனி மற்றும் ஞாயிற்றுக்கிழமை நடைபெறவுள்ளது. இந்தப் போட்டியை பாா்வையிட வருவோா், பிறருக்கு தீங்கு விளைவிக்கக்கூடிய எந்தப் பொருளும் அரங்குக்குள் எடுத்து வரக் கூடாது. அப்படி எடுத்து வந்தால், பாதுகாப்பு சோதனைச் சாவடிகளில் பறிமுதல் செய்யப்படும். அவை திரும்பத் தரப்படமாட்டாது.

கூா்மையான பொருள்களான பிளேடுகள், கத்திகள், கத்தரிக்கோல், ஆயுதங்கள், பாக்கெட் கத்திகள் மற்றும் பெப்பா் ஸ்பிரே, பெரிய சங்கிலிகள், ஆயுதங்கள் - துப்பாக்கிகள் , சுவிஸ் ராணுவ கத்திகள் போன்றவற்றை கொண்டு வரக் கூடாது. மேலும், லேசா்ஸ் -லேசா் லைட்டுகள், விலங்குகள் மற்றும் செல்லப் பிராணிகள், ஒலி அமைப்புகள் - ஏா் ஹாா்ன்கள், விசில் போன்ற சத்தம் எழுப்பக்கூடிய பொருள்கள், மெகாஃபோன்கள், இசைக்கருவிகள், போா்ட்டபிள் ஸ்பீக்கா்கள் ஆகியவற்றை கொண்டு வரத் தடை விதிக்கப்பட்டுள்ளது.

தீப்பற்றும் பொருள்களுக்கு தடை: தீப்பற்றக்கூடிய பொருள்களான தீப்பெட்டிகள், பட்டாசுகள், எளிதில் எரியக்கூடிய திரவங்கள், மதுபானம், போதைப்பொருள் எடுத்து வர தடைசெய்யப்பட்டுள்ளது. ஏதேனும் விதிமீறல் தெரிந்தால் பாா்வையாளா்கள் காவல்துறையிடம் ஒப்படைக்கப்படுவா்.

புகையிலை பொருள்கள், அங்கீகரிக்கப்படாத விளம்பர பொருட்கள் - ஃபிளையா்கள், ஸ்டிக்கா்கள், கடற்கரை பந்துகள், பரிசுகள் போன்றவை, ஸ்லீப்பிங் பேக்ஸ், குடைகள் அல்லது நிழல் கட்டமைப்புகள், வெளிப்புற உணவு மற்றும் பானங்கள் அனுமதிக்கப்படாது.

குறிப்பாக, தண்ணீா் பாட்டில்கள், கண்ணாடி பாட்டில்கள், மூடியுடன் கூடிய பிளாஸ்டிக் பாட்டில்கள், சீல் செய்யப்பட்ட தண்ணீா் பாட்டில்கள், திறந்த தண்ணீா் பாட்டில்கள், டின்கள், கேன்கள். ட்ரோன்கள் அல்லது வேறு ஏதேனும் அங்கீகரிக்கப்படாத பறக்கும் சாதனம். புகைபிடிக்கும் சாதனங்கள் ஆகியவற்றை கொண்டு வரக் கூடாது.

தனியா் வாகனங்கள் - ஸ்கேட்போா்டுகள், ரோலா்பிளேடுகள், ஸ்கூட்டா்கள், சைக்கிள்கள், வண்டிகள் அல்லது தனிப்பட்ட மோட்டாா் பொருத்தப்பட்ட வாகனங்கள் போன்றவை அனுமதி இல்லை.

உபகரணங்கள் - கைப்பைகள், குடைகள், லேப்டாப், லேப்டாப் பைகள், சூட்கேஸ், பெரிய மின்விசிறிகள், மோட்டாா் சைக்கிள் தலைக்கவசம், தலைக்கவசங்கள் போன்றவற்றுக்கு அனுமதி இல்லை. ஜாதி, மதம், பாலினம், மதம் மற்றும் இனத்திற்கு எதிரான புண்படுத்தும் பதாகைகள் அல்லது தவறான / பாரபட்சமான மொழி, வணிக விளம்பரம், ஆடை, தொப்பிகள், பதாகைகள், கொடிகள் போன்றவை தடை செய்யப்பட்டுள்ளன என்று செய்தியில் தெரிவிக்கப்பட்டுள்ளது.