சென்னை: சட்ட விரோத பண பரிமாற்ற தடை சட்ட வழக்கில் சினிமா தயாரிப்பாளா் ஜாபா் சாதிக்கை ஜூலை 29-ஆம் தேதி வரை நீதிமன்றக் காவலில் சிறையில் அடைக்க சென்னை மாவட்ட முதன்மை அமா்வு நீதிமன்றம் உத்தரவிட்டது.
போதைப்பொருள் கடத்தல் வழக்கில் மத்திய போதைப் பொருள் கடத்தல் தடுப்புப் பிரிவினரால் கடந்த மாா்ச் 9-ஆம் தேதி கைது செய்யப்பட்ட ஜாபா் சாதிக்கை, அமலாக்கத்துறை கடந்த ஜூன் 26 -ஆம் தேதி கைது செய்தது.
இந்த நிலையில், திஹாா் சிறையில் இருந்த ஜாபா் சாதிக்கை, சிறை மாற்று வாரன்ட் மூலம் சென்னைக்கு அழைத்து வந்த , அமலாக்கத் துறை சென்னை மாவட்ட முதன்மை அமா்வு நீதிமன்ற நீதிபதி அல்லி முன் திங்கள்கிழமை காலை ஆஜா்படுத்தியது. அப்போது, சட்டவிரோத பணப்பரிமாற்ற வழக்கில் ஜாபா் சாதிக்கை கைது செய்ததற்கான உத்தரவும்,15 நாள்கள் அமலாக்கத் துறை காவலில் எடுத்து விசாரிக்க கோரிய மனுவும் அமலாக்கத் துறை தரப்பில் முதன்மை அமா்வு நீதிமன்றத்தில் தாக்கல் செய்யப்பட்டது.
ஜாபா் சாதிக் தரப்பில் ஆஜரான மூத்த வழக்குரைஞா் அபுடு குமாா் ராஜரத்தினம், ‘போதைப்பொருள் வழக்கில் ஜாமீன் பெற்ற ஜாபா் சாதிக்குக்கு, சிறை வாரன்ட் மூலம் மீண்டும் கைது செய்து உத்தரவு பிறப்பிக்க முடியாது. இது சட்டவிரோதமானது’ என வாதிட்டாா். அமலாக்கத் துறை தரப்பில் ஆஜரான வழக்குரைஞா் ரமேஷ், ‘கைது நடவடிக்கைகள் மற்றும் சிறை மாற்ற வாரன்ட் என அனைத்தும் சட்ட விதிகளுக்கு உட்பட்டு தான் நடைபெற்றுள்ளது’ என வாதிட்டாா்.
‘அமலாக்கத் துறை துன்புறுத்துகிறது’: பின்னா், நீதிபதி அல்லி அமலாக்கத் துறை ஏதேனும் துன்புறுத்தலில் ஈடுபட்டதா? என ஜாபா் சாதிக்கிடம் கேள்வி எழுப்பினாா். இதற்கு பதில் அளித்த ஜாபா் சாதிக், ‘அமலாக்கத் துறை என்னை ஏற்கெனவே 3 நாள் காவலில் எடுத்து விசாரித்தது. அப்போது, சமூகத்தில் முக்கிய நபா்களாக இருக்கும் 4 நபா்களை இந்த வழக்கில் இணைக்க அமலாக்கத் துறை முயற்சித்தது. அவா்களின் பெயா்களை தெரிவிக்க வேண்டும் என என்னிடம் தெரிவிக்கப்பட்டது. என்னைத் திட்டமிட்டு அமலாக்கத் துறை துன்புறுத்துகிறது’ என்றாா். இரு தரப்பு வாதங்களைக் கேட்ட நீதிபதி அல்லி, வருகிற 29- ஆம் தேதி வரை ஜாபா் சாதிக்கை நீதிமன்றக் காவலில், புழல் சிறையில் அடைக்க உத்தரவிட்டாா்.