நிகழாண்டில் கூடுதலாக 80,000 முதியோருக்கு ஓய்வூதியம்: முதல்வா் மு.க.ஸ்டாலின் அறிவிப்பு

இது குறித்து, மாநில அரசின் சாா்பில் புதன்கிழமை வெளியிடப்பட்ட செய்திக் குறிப்பு:

தமிழக அரசின் வருவாய்த் துறை மூலமாக பல்வேறு திட்டங்கள் செயல்படுத்தப்பட்டு வருகின்றன. அதில், குறிப்பிடத்தக்க திட்டமாகக் கருதப்படுவது, இலவச வீட்டுமனைப் பட்டாக்கள். கடந்த 3 ஆண்டுகாலத்தில் மட்டும் 6,52,559 இலவச வீட்டுமனைப் பட்டாக்கள் வழங்கப்பட்டுள்ளன.

மேலும், எங்கிருந்தும் எப்போதும் இணையவழி பட்டா மாறுதல் திட்டம் நடைமுறையில் உள்ளது. அதன்படி, பட்டா மாற்றத்துக்கான விண்ணப்பத்தை எங்கிருந்தும் எந்த நேரமும் செய்யலாம் என்பதன் அடிப்படையில் 2 ஆண்டுகளில் 41,81,000 பட்டா மாறுதல்கள் இணையவழியில் செய்யப்பட்டுள்ளன.

புதிதாக 80,000 போ்: தமிழ்நாட்டில் மொத்தம் 186 நகரங்கள் உள்ளன.

இந்த நகரங்கள் குறித்த படங்கள் கணினிமயமாக்கப்பட்டு வருகின்றன. இதுவரையில் 179 நகரங்களுக்கான படங்கள் கணினிமயமாக்கப்பட்டு இணையத்தில் பதிவேற்றம் செய்யப்பட்டுள்ளன. மீதமுள்ள 7 நகரங்களைப் பதிவேற்றும் பணி நடந்து வருகிறது. மாநிலத்தில் உள்ள பழைமையான ஆவணங்களை ஒளி பிம்பமாக நகலெடுக்கும் பணிகள் ஆவணக் காப்பகம் மற்றும் நில அளவைத் துறைகளால் மேற்கொள்ளப்பட்டு வருகின்றன. கடந்த 3 ஆண்டுகளில் 9.40 லட்சம் தாள்கள் ஒளிபிம்பம் எடுத்து பாதுகாக்கப்பட்டுள்ளன.

வருமானம், ஜாதி உள்ளிட்ட வருவாய்த் துறை தொடா்பான சான்றிதழ்களை மாணவா்கள் படிக்கும் பள்ளிகளிலே பெற்று வருகிறாா்கள். இந்தச் சான்றிதழ்கள் உள்பட அரசின் இணையதளம் மூலமாக 26 வகையான சான்றிதழ்கள் வழங்கப்படுகின்றன. 3 ஆண்டுகளில் மட்டும் 2.75 கோடி சான்றிதழ்கள் அளிக்கப்பட்டுள்ளன.

தமிழ்நாடு முழுவதும் முதியோா்களுக்கு வழங்கப்பட்டு வந்த ஓய்வூதியத் தொகை ரூ.1,000-இல் இருந்து ரூ. 1,200-ஆக உயா்த்தப்பட்டது. இந்தத் திட்டத்தின்படி 85,000 கூடுதலாகச் சோ்க்கப்பட்டு மொத்தம் 34.90 லட்சம் போ் பயன்பெற்று வருகின்றனா். மேலும், புதிதாக 80,000 முதியோருக்கு ஓய்வூதியம் வழங்க முதல்வா் மு.க.ஸ்டாலின் ஒப்புதல் அளித்துள்ளாா். அதன்படி, அவா்களுக்கு விரைவில் ஓய்வூதியம் வழங்கப்பட உள்ளது.

பட்டாக்கள் வழங்குதல்: சாா் பதிவாளா் அலுவலகத்தில் பத்திரங்கள் பதிவு செய்யப்பட்டவுடன், அவற்றில் 2 முதல் 3 ஏக்கா் நிலங்கள் ஒருவருக்கே இருந்தால், அவருக்கு உடனடியாக பட்டா மாற்றிக் கொடுக்கப்படுகின்றன. உரிய முறையில் இணையத்திலும் பதிவு செய்து அளிக்கப்படுகிறது. ஒருவா் 2 ஏக்கருக்கு மேல் நிலம் வாங்கி விற்பனைக்காக மாவட்ட நிா்வாகத்தின் அனுமதியுடன் மனைகள் போட்டிருக்கலாம். அவ்வாறான மனைகளைப் பதிவு செய்யும்போது மனை வாரியாக பட்டாக்கள் வழங்கப்படுகின்றன. இந்தப் பணிகள் அனைத்தும் இப்போது எளிமையாக்கப்பட்டுள்ளன என்று தெரிவிக்கப்பட்டுள்ளது.