ஆம்பூர் அருகே சூறாவளி காற்றுடன் கன மழை: வாழை மரங்கள் சேதம்

ஆம்பூர் அருகே சனிக்கிழமை மாலை சூறாவளி காற்றுடன் செய்த கன மழை காரணமாக வாழை மரங்கள் சேதமடைந்தன.

திருப்பத்தூர் மாவட்டத்தில் சனிக்கிழமை காலையிலேயே வெயிலின் தாக்கம் அதிகமாக காணப்பட்டது. அனல் காற்று வீசியது. 107.24 டிகிரி ஃபாரன்ஹீட் பதிவாகியிருந்தது.

ஆனால் மாலை சுமார் 3.45 மணிக்கு திடீரென வானத்தில் கருமேகங்கள் சூழ்ந்து சூறாவளி காற்று வீசத் தொடங்கியது.

ஆம்பூர் நகரில் சில பகுதிகளில் சில நிமிடங்கள் லேசான தூரல் விழுந்தது. ஆனால் ஆம்பூரை சுற்றியுள்ள மிட்டாளம் ஊராட்சி பைரப்பள்ளி, அரங்கல்துருகம் உள்ளிட்ட கிராமங்களில் சூறாவளி காற்றுடன் கன மழை பெய்தது.

அரங்கல்துருகம் கிராமத்தில் சங்கர் என்ற விவசாயி நிலத்தில் பயிரிடப்பட்டிருந்த வாழை மரங்கள் சூறாவளி காற்றால் முறிந்து விழுந்தன. தென்னை மரம் ஒன்றும் முறிந்து விழுந்தது. சில பகுதிகளில் மின்தடை ஏற்பட்டது.