தமிழகத்தில் அடுத்த 2 நாள்களுக்கு கனமழை பெய்யும் என வானிலை ஆய்வு மையம் தெரிவித்துள்ளது.
எங்கெல்லாம் கோடைமழை
தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி மின்னல் மற்றும் பலத்த காற்றுடன் லேசானது முதல் மிதமான மழை பெய்யக்கூடும்.
நாளை(மே 07) நீலகிரி, கோயம்புத்தூர், ஈரோடு, சேலம், தர்மபுரி, கிருஷ்ணகிரி மற்றும் திருப்பத்தூர் மாவட்டங்களில் ஓரிரு இடங்களில் கனமழை பெய்ய வாய்ப்புள்ளது.
நாளை மறுநாள்(மே 08) நீலகிரி, கோயம்புத்தூர், தேனி, திண்டுக்கல், விருதுநகர், தென்காசி மற்றும் திருநெல்வேலி மாவட்டங்களில் ஓரிரு இடங்களில் கனமழை பெய்ய வாய்ப்புள்ளது.
வெப்ப அலை முன்னெச்சரிக்கை
அடுத்த 2 நாள்களுக்கு தமிழக உள் மாவட்டங்களில் அதிகபட்ச வெப்பநிலை நிலவும். அதற்கடுத்த 3 நாள்களுக்கு அதிகபட்ச வெப்பநிலை 2 செல்சியஸ் வரை படிப்படியாகக் குறையக்கூடும்.
வடதமிழகத்தின் உள் மாவட்டங்களில் ஓரிரு இடங்களில் வெப்ப அலை வீசக்கூடும்.
மே 10 வரை வட தமிழக உள் மாவட்டங்களின் சமவெளி பகுதிகளில் ஒருசில இடங்களில் 41-43 டிகிரி செல்சியஸ், இதர தமிழக மாவட்டங்களின் சமவெளி பகுதிகளில் 39-40 டிகிரி செல்சியஸ், கடலோர தமிழக மாவட்டங்கள், புதுவை மற்றும் காரைக்கால் பகுதிகளில் 36 - 38 டிகிரியும் இருக்கக்கூடும்.
மீனவர்கள்
தெற்கு ஆந்திர கடலோரப்பகுதிகளில் சூறாவளிக்காற்று மணிக்கு 45 முதல் 55 கி.மீட்டர் வேகத்திலும் இடையிடையே 65 கி.மீட்டர் வேகத்திலும் வீசக்கூடும் என்பதால் மீனவர்கள் கடலுக்குள் செல்லவேண்டாம் என அறிவுறுத்தப்படுகிறார்கள்.
கடந்த 24 மணி நேரத்தில் பதிவான மழை
காமாட்சிபுரம், பேரையூர் தலா 5 செ.மீ, ஆண்டிபட்டி 4, மாயனூர், வேடசந்தூர் தலா 3, கடவூர், பொன்னையார் அணை தலா 2, நாமக்கல், பென்னாகரம், கோபிசெட்டிபாளையம் தலா 1 செ.மீ மழையும் பதிவாகியுள்ளன.
கடந்த 24 மணி நேரத்தில் பதிவான வெப்ப அலை
அதிகபட்ச வெப்பநிலை கரூர் பரமத்தியில் 43.8 செல்சியஸ், ஈரோட்டில் 43.4, மற்றும் திருப்பத்தூரில் 42.2, வேலூரில் 42.1 செல்சியஸ் ஆகவும் பதிவானது.