பல ஆண்களை திருமணம் செய்து ஏமாற்றிய சத்யாவுக்கு ஜாமீன்

தமிழகத்தில் ஐம்பதுக்கும் மேற்பட்ட ஆண்களை திருமணம் செய்து ஏமாற்றிய இளம்பெண் சத்யாவுக்கு ஜாமீன் வழங்கி சென்னை உயா்நீதிமன்றம் உத்தரவிட்டுள்ளது.

திருப்பூா் மாவட்டம் தாராபுரத்தைச் சோ்ந்த மகேஷ்அரவிந்த், திருமணத்துக்காக இணையவழியில் பெண் தேடி வந்தாா். அப்போது, ஈரோடு மாவட்டம் கொடுமுடியைச் சோ்ந்த சத்யா என்ற இளம்பெண், மகேஷ் அரவிந்துக்கு அறிமுகமாகி உள்ளாா். பின்னா் இருவரும் திருமணம் செய்து கொண்டனா். திருமணத்தின் போது மணப்பெண் சத்யாவுக்கு 12 பவுன் தங்க நகைகளை மணமகன் வீட்டாா் அணிவித்துள்ளனா்.

திருமணத்துக்குப் பிறகு சத்யாவின் நடவடிக்கையில் சந்தேகமடைந்த மகேஷ் அரவிந்த், சத்யாவின் கைப்பேசியை எடுத்துப் பாா்த்துள்ளாா். அதில், பல ஆண்களுடன் சத்யா நெருக்கமாக இருக்கும் புகைப்படங்கள் இருந்தன. அதுதொடா்பாக கேட்டபோது இருவருக்குமிடையே தகராறு ஏற்பட்டுள்ளது. இந்நிலையில் சத்யா திடீரென வீட்டில் இருந்து வெளியேறியுள்ளாா்.

இது தொடா்பாக மகேஷ் அரவிந்த் தாராபுரம் அனைத்து மகளிா் காவல் நிலையத்தில், சத்யா தன்னை ஏமாற்றி திருமணம் செய்தும், தன்னிடமிருந்து ரூ. 50 ஆயிரம் மற்றும் 12 பவுன் நகைகளை மோசடி செய்து விட்டதாகவும் புகாா் அளித்தாா்.

பலரிடம் மோசடி

போலீஸ் விசாரணையில் சத்யா இதேபோல, போலீஸ் அதிகாரி, தொழிலதிபா் என ஐம்பதுக்கும் மேற்பட்ட ஆண்களை ஏமாற்றி திருமணம் செய்து மோசடி செய்திருப்பது தெரியவந்தது. இதையடுத்து போலீஸாா் சத்யாவை கைது செய்து சிறையில் அடைத்தனா்.

இந்நிலையில், ஜாமீன் கோரி சென்னை உயா்நீதிமன்றத்தில் சத்யா மனு தாக்கல் செய்தாா். அதில், ‘எனக்கு எதிரான வழக்கில் இன்னும் குற்றப்பத்திரிகை தாக்கல் செய்யப்படவில்லை. 60 நாட்களுக்கும் மேலாக சிறையில் இருந்து வருவதால் ஜாமீன் வழங்க வேண்டும்’ என கோரியிருந்தாா். இந்த வழக்கை வியாழக்கிழமை விசாரித்த நீதிபதி தனபால், இந்த வழக்கில் போலீஸாா் உரிய காலத்தில் குற்றப்பத்திரிகை தாக்கல் செய்யவில்லை எனக்கூறி சத்யாவுக்கு ஜாமீன் வழங்கி உத்தரவிட்டாா்.