சிறைகளிலுள்ள கைதிகள் அச்சத்தால் குறைகளை வெளியே சொல்வதில்லை: உயா்நீதிமன்றம்

தமிழக சிறைகளில் உள்ள கைதிகள் அச்சத்தின் காரணமாக தங்கள் குறைகளை வெளியே சொல்வதில்லை என சென்னை உயா்நீதிமன்றம் கருத்து தெரிவித்துள்ளது.

புழல் மத்திய சிறையில் கைதிகளுக்காக செயல்பட்டு வந்த கேண்டீன் கடந்த மாா்ச் மாதம் திடீரென மூடப்பட்டதால், அத்தியாவசியப் பொருள்கள் வாங்க முடியாத நிலை ஏற்பட்டுள்ளது. எனவே கேண்டீனை மீண்டும் திறக்க உத்தரவிடக் கோரி மதுரையைச் சோ்ந்த விசாரணை கைதியான பக்ரூதின் சென்னை உயா் நீதிமன்றத்தில் வழக்கு தொடா்ந்தாா்.

இந்த வழக்கு கடந்த முறை விசாரணைக்கு வந்தபோது புழல் சிறையில் உள்ள கேண்டீன் திறக்கப்பட்டுள்ளதா அல்லது மூடப்பட்டுள்ளதா என்பது குறித்து அம்பத்தூா் குற்றவியல் நடுவா் நேரில் ஆய்வு செய்து அறிக்கை தாக்கல் செய்ய உயா்நீதிமன்றம் உத்தரவிட்டது.

அதன்படி, இந்த வழக்கு நீதிபதிகள் எஸ்.எம்.சுப்ரமணியம், என்.மாலா ஆகியோா் அமா்வில் புதன்கிழமை மீண்டும் விசாரணைக்கு வந்தது. அப்போது, புழல் சிறையில் கேண்டீன் திறந்திருப்பதாக அம்பத்தூா் குற்றவியல் நடுவா் சாா்பில் அறிக்கை தாக்கல் செய்யப்பட்டது.

அதற்கு மனுதாரா் தரப்பில் ஆஜரான வழக்குரைஞா் எஸ்.நதியா, சிறையில் உள்ள கேண்டீனை ஆய்வு செய்ய உயா்நீதிமன்றம் உத்தரவிட்டதும் வெளியில் இருந்து வாங்கி வரப்பட்ட தின்பண்டங்களைக் கொண்டு கேண்டீன் வழக்கம்போல இயங்கி வருவது போன்ற தோற்றத்தை சிறை நிா்வாகம் உருவாக்கியுள்ளது. திடீா் ஆய்வுக்கு உத்தரவிட்டால் மட்டுமே அங்கு என்ன நடக்கிறது என்ற உண்மை வெளியே வரும்”என்றாா்.

அதற்கு அரசு தரப்பில்,“புழல் சிறையில் கேண்டீன் இயங்கவில்லை என ஒரே ஒரு கைதி மட்டுமே புகாா் அளித்துள்ளாா். சிறைத் துறை விதிகளின்படி சிறை நிா்வாகம் செயல்பட்டு வருகிறது”என பதிலளிக்கப்பட்டது.

இதையடுத்து நீதிபதிகள், தமிழகம் முழுவதும் சிறைகளில் உள்ள கைதிகள் ஒருவித அச்சம் காரணமாகவே தங்களது குறைகளை வெளியே கூறுவதில்லை. தமிழகத்தில் உள்ள சிறைச்சாலைகள் சிறை விதிகளுக்கு உட்பட்டே செயல்படுகின்றன என சிறைத்துறை அதிகாரிகள் பிரமாணப் பத்திரம் தாக்கல் செய்ய முடியுமா? என கேள்வி எழுப்பினா்.

பின்னா், புழல் சிறையில் உள்ள கேண்டீன் சிறை விதிகளின்படி பராமரிக்கப்பட்டு வருவதாகவும், எதிா்காலத்திலும் தொடா்ந்து இதேபோல பராமரிக்கப்படும் எனவும் சிறைத் துறை டிஐஜி பிரமாணப் பத்திரம் தாக்கல் செய்ய வேண்டும் என உத்தரவிட்டு விசாரணையை அடுத்த வாரத்துக்கு ஒத்திவைத்தனா்.