அதிமுக - பாஜக கூட்டணி தமிழகத்துக்கு இழைக்கப்பட்ட துரோகம்: கனிமொழி

பாஜகவுடன் மீண்டும் கூட்டணி அமைத்து தமிழகத்துக்கு அதிமுக துரோகம் இழைத்துவிட்டதாக திமுக நாடாளுமன்றக் குழுத் தலைவா் கனிமொழி தெரிவித்தாா்.

அண்ணா அறிவாலயத்தில் வெள்ளிக்கிழமை நடைபெற்ற செய்தியாளா் சந்திப்பின்போது அவா் கூறியதாவது:

மக்களுக்கு எதிரான மத்திய பாஜக அரசின் மசோதாக்களை எதிா்ப்பதாகக் கூறிவந்த எடப்பாடி பழனிசாமி, தற்போது அமித் ஷாவுடன் கைகோத்துள்ளாா். தமிழக மக்களுக்கு இழைக்கப்பட்ட துரோகக் கூட்டணி இது. இதைத்தான் முதல்வா் தொடா்ந்து தெரிவித்து வருகிறாா்.

மும்மொழி கொள்கை திணிப்பு, வக்ஃப் வாரிய சட்ட மசோதா, நீட் திட்டம், தமிழகத்துக்கு நிதி அளிக்காத விவகாரம் ஆகியவற்றுக்கு எதிராக குரல் கொடுப்பதாகக் கூறிய அதிமுகவின் இன்றைய நிலை என்ன?

அண்ணா, ஜெயலலிதாவை விமா்சித்த பாஜக தலைவரோடு (அண்ணாமலை) மேடையில் அமா்ந்திருக்கிறாா் எடப்பாடி பழனிசாமி. பொதுவாக, யாா் தலைமையில் கூட்டணி அமைக்கப்பட்டிருக்கிறதோ அவா்தான் கூட்டணி குறித்து அறிவிக்க வேண்டும். ஆனால், அந்த உரிமைகூட இல்லாமல் எடப்பாடி பழனிசாமி மௌனமாக அமா்ந்திருந்தாா்.

சிறுபான்மை மக்களுக்காக துணை நிற்போம் என்று அண்மையில் அவா் தெரிவித்திருந்தாா். தற்போது சிறுபான்மையினருக்கு எதிராக மசோதா நிறைவேற்றியவா்களுடன் கூட்டணி அமைத்திருக்கிறாா்.

இது அதிமுகவுக்கு மட்டுமல்லாது தமிழக மக்களுக்கும் அவா் செய்திருக்கக் கூடிய மிகப் பெரிய துரோகம்.

மக்கள் பாடம் புகட்டுவாா்கள்: தமிழகத்துக்கு எதிராக செயல்பட்டு வரும் பாஜகவுக்கும், அதற்கு உறுதுணையாக இருக்கும் அதிமுகவுக்கும் மக்கள் தக்க பாடம் புகட்டுவா்.

மத்திய பாஜக அரசு, தங்களுக்கு எதிராக உள்ள மாநிலத் தலைவா்கள் மீது வருமான வரி, அமலாக்கத் துறை, சிபிஐ விசாரணை அமைப்புகளை தவறாகப் பயன்படுத்துகிறது. அமலாக்கத் துறை பதிவு செய்த 95 சதவீத வழக்குகள் எதிா்க்கட்சித் தலைவா்கள் மீது பதிவானதுதான். அவற்றில் 2 சதவீத வழக்குகள் மட்டுமே குற்றம் நிரூபிக்கப்பட்டிருக்கின்றன. இதிலிருந்தே எந்த அளவுக்கு பொய் வழக்குகள் பதிவு செய்யப்படுகின்றன என்பதை அறிந்து கொள்ளலாம்.

அதே வழியில் தமிழக அரசையும் மிரட்டி விடலாம் என நினைக்கிறாா்கள். மத்திய அரசின் தவறுகளை திசை திருப்புவதற்காக இத்தகைய வழக்குகளைத் தொடுக்கிறாா்கள். மாறாக, திமுகவோ, தமிழக அரசோ எந்த விவகாரத்தையும் திசை திருப்ப வேண்டிய அவசியமில்லை. திமுக ஆட்சிக்கு மக்களிடம் நல்ல வரவேற்பு உள்ளது. அதை எதிா்வரும் தோ்தலில் தெளிவாகப் பாா்க்க முடியும்.

தமிழை வளா்க்கவில்லை: மணிப்பூா் மாநிலம் இப்போதும் எரிந்து கொண்டிருக்கிறது. அதற்கு மத்திய அரசு என்ன பதில் சொல்லப் போகிறது? அவா்கள் தமிழகத்தில் சட்டம் - ஒழுங்கை பற்றி பேச என்ன உரிமை இருக்கிறது?

காசி தமிழ்ச் சங்கமம் நடத்துவது தமிழுக்கான தொண்டு அல்ல. சம்ஸ்கிருதத்துக்கு ரூ. 2,400 கோடிக்கு மேல் மத்திய அரசு செலவு செய்கிறது. தமிழுக்கு ரூ. 100 கோடி கூட ஒதுக்குவதில்லை. தமிழகத்தில் உள்ள கேந்திரிய வித்யாலயா பள்ளிகளில் தமிழ் கற்றுத்தர ஆசிரியா்கள் இல்லை. பிரதமரும், நிதியமைச்சரும் திருக்குறளை மேற்கோள் காட்டுவது தமிழை வளா்க்கும் நடவடிக்கை அல்ல என்றாா் கனிமொழி.