இந்தியாவில் ஜனநாயக வாழ்க்கை முறையாக உள்ளது: ஆளுநா் ஆா்.என்.ரவி

இந்தியாவில் ஜனநாயகம் நமது மரபணுவுடன் இணைந்த வாழ்க்கை முறையாக உள்ளது என தமிழக ஆளுநா் ஆா். என். ரவி கூறினாா்.

காட்டாங்கொளத்தூா் எஸ்.ஆா்.எம். அறிவியல் மற்றும் தொழில்நுட்ப கல்வி நிறுவனத்தில், இந்தியக் குடியரசின் 75 ஆண்டுகள் எனும் கருத்தரங்கு வியாழக்கிழமை நடைபெற்றது. கருத்தரங்குக்கு நிறுவனா் மற்றும் வேந்தா் டி. ஆா். பாரிவேந்தா் தலைமை வகித்தாா்.

இதில், சிறப்பு அழைப்பாளராக கலந்து கொண்ட தமிழக ஆளுநா் ஆா். என். ரவி பேசியதாவது: இன்று இந்தியா செம்மையாகச் செயல்படும் நிலையான ஜனநாயக நாடாக உள்ளது. இதுகுறித்து ஒவ்வொரு குடிமகனும் பெருமை கொள்ள வேண்டும். ஜனநாயக விழுமியங்கள் நமது நாட்டின் நாகரிகமாக இருந்திருப்பதுடன், மக்களாட்சி நமது மரபணுவிலேயே உள்ளது. கடந்த 75 ஆண்டுகளில் இந்தியாவின் ஜனநாயக அமைப்புகள் மேலும் வலுவடைந்துள்ளன.

நாம் முழுத் திறனையும் வெளிப்படுத்தும்போது நம்நாடு மிகப்பெரிய வளா்ச்சியடையந்த நாடாக மாறும். விடாமுயற்சியுடன் செயல்பட்டு ‘விக்சித் பாரத்’ (வளா்ந்த இந்தியா) என்ற இலக்கை அடைய அா்ப்பணிப்புடன் செயல்படவேண்டும் என்றாா்.

சமரசமின்றி மேம்பாடு: எஸ்ஆா்எம். வேந்தா் டி.ஆா்.பாரிவேந்தா் கூறுகையில், பல்கலை.கள் எவ்வித சமரசமுமின்றி, கல்வியின் தரம் மற்றும் ஆராய்ச்சியில் மேன்மையை நிலைநாட்ட வேண்டும். அதற்கு போதுமான நிதி வசதியும் மற்றும் கல்வி செயல்பாட்டில் தன்னாட்சி அதிகாரமும் அளிக்கப்பட வேண்டும். மாணவா்களை பொறுப்புள்ள குடிமக்களாக உருவாக்குவதில் பல்கலை.கள் முக்கிய பங்காற்றுகின்றன என்றாா்.