முன்னாள் படைவீரர்கள், விதவைகளுக்கான மாதாந்திர நிதியுதவி ரூ. 6000-ஆக உயர்வு! பொதுத் துறை அறிவிப்புகள்!

சட்டப்பேரவையில் இன்று(செப். 8) பொதுச் துறை மானிய கோரிக்கை தாக்கல் செய்யப்பட்டு, அந்தத் துறை சார்பில் முக்கிய அறிவிப்புகள் வெளியிடப்பட்டது.

• முதல்வரின் உதவி மைய இணையதளத்தில், செயற்கை நுண்ணறிவு (Artificial Intelligence) திறனுடைய சாட்பாட் (Chatbot) மற்றும் உரையாடும் வாய்ஸ்பாட் (Interactive Voicebot) சேவை அறிமுகப்படுத்தப்படும். இதற்காக ஆண்டுதோறும் ரூ. 2.18 கோடி நிதி ஒதுக்கீடு செய்யப்படும்.

• பொதுமக்கள் முதல்வரின் உதவி மைய இணையதளச் சேவைகளை எளிதில் பயன்படுத்துவதற்கு, அனைத்து மாவட்ட ஆட்சியர் அலுவலகங்களிலும், சென்னை, தலைமைச் செயலகத்திலும் டிஜிட்டல் கியோஸ்க்குகள் (Digital Kiosks) நிறுவுவதற்காக ரூ. 30 லட்சம் நிதி ஒதுக்கீடு செய்யப்படும்.

• முகாம்வாழ் இலங்கைத் தமிழர்களுக்கு வழங்கப்பட்டு வரும் மாதாந்திர பணக்கொடையினை மேலும் உயர்த்தி குடும்பத் தலைவருக்கு ரூ.1,800-ஆகவும், குடும்பத்திலுள்ள 12 வயது மற்றும் அதற்கு மேற்பட்ட பெரியவர்களுக்கு ரூ.1,200- ஆகவும் மற்றும் 12 வயதுக்குள்பட்ட குழந்தைகளுக்கு ரூ.600/- ஆகவும் வழங்கப்படும்.

• முகாம்வாழ் இலங்கைத் தமிழர்களின் பிள்ளைகளுக்கு உயர்கல்வி பயில வழங்கப்பட்டு வரும் கல்வி உதவித்தொகை அனைத்து படிப்புகளுக்கும் தலா ரூ. 2,000 உயர்த்தி வழங்கப்படும்.

• வெளிநாடுகளில் வாழும் தமிழர்களின் நலனுக்காக பொதுநல நோக்கில் உதவிகளைச் செய்து வரும் அயலகத் தமிழர்களுக்கு 'வெற்றித் தமிழர் விருது' என்ற புதிய விருது வழங்கி கௌரவிக்கப்படும்.

• வெளிநாட்டு வேலைவாய்ப்பிற்கான செயற்கை நுண்ணறிவு (AI) அடிப்படையிலான உடனடி உலகளாவிய பொருத்தம் (IGM) என்ற தளம் உருவாக்கப்படும்.

• தமிழ்நாட்டு இளைஞர்கள் வெளிநாட்டு வேலைவாய்ப்புகளைப் பெறும் பொருட்டு அவர்களுக்கு இலவசமாக ஜெர்மன் மொழிப்பயிற்சி அளிக்கப்படும்.

• முன்னாள் படைவீரர்கள் மற்றும் விதவைகளுக்கான மாதாந்திர நிதியுதவி ரூ.4000-லிருந்து ரூ.6000-ஆக உயர்த்தி வழங்கப்படும்.

• தமிழ்நாடு முன்னாள் படைவீரர்கள் கழகத்தின் பல்வேறு நிர்வாகப் பணிகளுக்கான ஒருங்கிணைந்த வலைத்தளச் செயலி ரூ. 38 லட்சம் மதிப்பீட்டில் உருவாக்கப்படும்.