சுற்றுச்சூழல் மற்றும் காலநிலைத் துறை சார்பில் வெளியிடப்பட்ட முக்கிய அறிவிப்புகள்!

சட்டப்பேரவையில் இன்று(செப். 7) சுற்றுச்சூழல் மற்றும் காலநிலைத் துறை மானியக் கோரிக்கையை தாக்கல் செய்த அமைச்சர் வே. ராஜீவ் சில முக்கிய அறிவிப்புகளை வெளியிட்டார்.

• உயிர்ப்பன்மயத்தினை மேம்படுத்திப் பாதுகாக்கும் நோக்கில் ரூ. 2 கோடி மதிப்பீட்டில் நகர உயிர்ப்பன்மயக் குறியீடு உருவாக்கப்படும்.

• காலநிலை குறித்த விழிப்புணர்வை ஏற்படுத்தவும் மற்றும் அறிவைப் பகிரவும் காலநிலை மாற்றத் தகவல் தொடர்புக்கான கருவித்தொகுப்பு மற்றும் இணையவழி கற்றல் தளம் உருவாக்கப்படும்.

• தமிழ்நாட்டை காலநிலை மீள்திறன்மிகு மாநிலமாக மாற்றும் முயற்சியில், ஆண்டுதோறும் 200 அரசு மற்றும் அரசு உதவிபெறும் பள்ளிகள், 5 அரசுக் கல்லூரிகள் ரூ. 53.75 கோடி மதிப்பீட்டில் நீலப் பசுமை வளாகங்களாக மாற்றியமைக்கப்படும்.

• தமிழ்நாட்டில் ஆறு இடங்களில் காலநிலை மீள்திறன் மையங்கள் ரூ. 6 கோடி மதிப்பீட்டில் உருவாக்கப்படும்.

தமிழ்நாடு மாசு கட்டுப்பாடு வாரியம்

• நிகழ்நேர சுற்றுச்சூழல் கண்காணிப்பு மற்றும் விரைவு நடவடிக்கைக்காக ரூ. 7.50 கோடி மதிப்பீட்டில் ஐந்து நடமாடும் சுற்றுச்சூழல் கண்காணிப்பு வாகனங்கள் இயக்கப்படும்.

• சுற்றுச்சூழல் கண்காணிப்பு மற்றும் அவசரநிலை நடவடிக்கை அமைப்புகளை வலுப்படுத்தும் நோக்கில் ரூ. 5 கோடி மதிப்பீட்டில் ஐந்து அவசரகால பதிலளிப்பு மையங்கள் நிறுவப்படும்.

• காற்று தர கண்காணிப்பை வலுப்படுத்தும் நோக்கில் ரூ. 8 கோடி மதிப்பீட்டில் 80 இடங்களில் உணரிகை (சென்சார்) அடிப்படையிலான தொடர் சுற்றுப்புற காற்று தரக் கண்காணிப்பு நிலையங்கள் நிறுவப்படும்.

• தொழிற்சாலைகளுக்கான சுற்றுச்சூழல் செயல்திறனை மேம்படுத்த தன்னார்வ பசுமை மதிப்பீடு சான்றிதழ் பெறும் தொழிற்சாலைகளுக்கு ஊக்க சலுகைகள் அளிக்கப்படும்.

• தமிழ்நாடு மாசு கட்டுப்பாடு வாரியத்திற்கு சொந்தமான அலுவலகங்களில், நிலைத்த பசுமைக் கட்டட முன்முயற்சிகள் ரூ. 5 கோடி மதிப்பீட்டில் செயல்படுத்தப்படும்.