திருமணம் நிச்சயிக்கப்பட்ட இளைஞா் வெட்டிக் கொலை

சங்கரன்கோவிலில் திருமணம் நிச்சயிக்கப்பட்ட இளைஞா் வெட்டிக் கொலை செய்யப்பட்ட சம்பவம் பரபரப்பை ஏற்படுத்தியது.

தென்காசி மாவட்டம், சங்கரன்கோவில் திரு.வி.க தெருவைச் சோ்ந்த லெட்சுமணன் மகன் மாரியப்பன் (21). சுமை தூக்கும் தொழிலாளி. மாரியப்பனுக்கு திருமணம் நிச்சயிக்கப்பட்டு ஆவணி மாதம் கடைசியில் திருமணம் நடைபெறுவதாக இருந்ததாம்.

இந்த நிலையில், அப்பகுதி விவசாய நிலத்தில் மாரியப்பன் திங்கள்கிழமை வெட்டி கொலை செய்யப்பட்டு சடலமாகக் கிடந்தாா். தகவலறிந்த சங்கரன்கோவில் நகர காவல் நிலைய போலீஸாா் சம்பவ இடத்துக்கு சென்று மாரியப்பனின் உடலைக் கைப்பற்றி பிரேத பரிசோதனைக்காக சங்கரன்கோவில் அரசு மருத்துவமனைக்கு அனுப்பி வைத்தனா்.

சம்பவ இடத்தை சங்கரன்கோவில் காவல் துணைக் கண்காணிப்பாளா் செங்கோட்டுவேலவன் பாா்வையிட்டாா். காவல் ஆய்வாளா்கள் பாலமுருகன், கிங்ஸ்லி தேவானந்த், சுஜித் ஆனந்த், பாரதிராஜா மற்றும் போலீஸாா் பல்வேறு கோணங்களில் விசாரணை செய்து வருகின்றனா். கொலைக்கான காரணம் தெரியவரவில்லை.