மேலகரத்தில் மளிகைப் பொருள்கள் சிறப்புத் தொகுப்புக்கு தட்டுப்பாடு

தென்காசி மாவட்டம், மேலகரத்தில் 10 பொருள்கள் அடங்கிய சிறப்பு மளிகைத் தொகுப்புக்கு தட்டுப்பாடு ஏற்பட்டுள்ளதால் பொதுமக்கள் ஏமாற்றமடைந்துள்ளனா்.

நுகா்வோருக்கு அத்தியாவசிய மளிகைப் பொருள்கள் நியாயமான விலையில் கிடைக்கும் வகையில், 10 மளிகைப் பொருள்கள் அடங்கிய சிறப்புத் தொகுப்பு ரூ. 200-க்கு விற்பனை செய்யப்படும் என அறிவிக்கப்பட்டிருந்தது.

தென்காசி மாவட்டத்தில் இத்திட்டத்தை மாவட்ட ஆட்சியா் மோனிகா ராணா அக். 30ஆம் தேதி, மேலகரத்தில் தொடங்கி வைத்தாா். இந்தத் திட்டம் பொதுமக்களிடையே மிகுந்த வரவேற்பைப் பெற்றது.

இதனிடையே, மேலகரத்தில் செயல்படும் மாவட்ட கூட்டுறவு மொத்த விற்பனை பண்டகசாலையின் சுயசேவைப் பிரிவில் 2 நாள்கள் மட்டுமே மளிகைத் தொகுப்பு விற்பனை செய்யப்பட்டது. பின்னா், தொகுப்பு கிடைக்காததால் பொதுமக்கள் ஏமாற்றமடைந்துள்ளனா்.

எனவே, அனைவருக்கும் சிறப்பு மளிகைத் தொகுப்பு கிடைக்க அதிகாரிகள் உரிய நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனா்.