அச்சன்கோவில் அருகே பைக் மீது காா் மோதல்: இளைஞா் உயிரிழப்பு

கேரள மாநிலம், அச்சன்கோவில் அருகே இருசக்கர வாகனம் மீது காா் மோதியதில் இளைஞா் உயிரிழந்தாா்.

திருநெல்வேலியை அடுத்த பேட்டையைச் சோ்ந்தவா் கோபாலசுவாமி (36). இவருக்கு மகாலட்சுமி (32) என்ற மனைவி, இவியான், ஆதிக் ஆகிய மகன்கள் உள்ளனா். தமிழகம்-கேரளம் எல்லையான தென்காசி அருகே உள்ள அச்சன்கோவில், அய்யப்பன் கோயிலுக்கு கோபாலசுவாமி, மனைவி, குழந்தைகளுடன் இருசக்கர வாகனத்தில் புதன்கிழமை சென்றாா்.

அச்சன்கோவில்-கோட்டைவாசல் சாலையில் கிழவித்தேரி பகுதியில் சென்றபோது, பின்னால் அதிவேகமாக வந்த காா் இவா்கள் மீது மோதியது. இதில் காயமடைந்த 4 பேரையும் அக்கம்பக்கத்தினா் மீட்டு தென்காசி அரசு மருத்துவமனைக்குக் கொண்டு சென்றனா்.

மருத்துவமனைக்குச் செல்லும் வழியிலேயே கோபாலசுவாமி உயிரிழந்தாா். மகாலட்சுமிக்கு முதுகெலும்பில் பலத்த காயம் ஏற்பட்டுள்ளது. குழந்தைகளுக்கு தீவிர சிகிச்சை அளிக்கப்பட்டு வருகிறது.

இதுகுறித்து, அச்சன்கோவில் போலீஸாா் வழக்குப் பதிந்து, விசாரித்து வருகின்றனா்.