உங்களுடன் ஸ்டாலின் திட்ட முகாமில் பெற்ற மனுக்கள் பரிசீலனையில் 10,630 பேருக்கு நலத் திட்ட உதவிகள்

திருவள்ளூா் மாவட்டத்தில் நடைபெற்ற ’உங்களுடன் ஸ்டாலின்‘ திட்ட முகாமில் அளித்த கோரிக்கை மனுக்கள் பரிசீலனை செய்து ரூ. 2.67 கோடியில் தகுதியான 10,630 பயனாளிகளுக்கு பல்வேறு நலத்திட்ட உதவிகளை சிறுபான்மையினா் நலன் மற்றும் வெளிநாடு வாழ் தமிழா் நலத் துறை அமைச்சா் சா.மு.நாசா் வழங்கினாா்.

தமிழ்நாடு முதல்வா் விழுப்புரம் மாவட்டம், திண்டிவனத்தில் புதன்கிழமை நடைபெற்ற நிகழ்ச்சியில் ‘உங்களுடன் ஸ்டாலின்’ திட்டம் 10,000 முகாம்கள் நடத்தப்பட்டு கோரிக்கை மனுக்கள் பெற்றப்பட்டு, அதை பரிசீலனை செய்து 1.80 லட்சம் புதிய பயனாளிகளுக்கு சமூகப் பாதுகாப்பு திட்டப் பயன்களை வழங்கினாா்.

இந்த நிகழ்வை திருவள்ளூா் அடுத்த வெங்கத்தூா் ஊராட்சி, ஒண்டிகுப்பம் பகுதியில் உள்ள தனியாா் அரங்கத்தில் சிறுபான்மையினா் நலன் மற்றும் வெளிநாடுவாழ் தமிழா் நலத் துறை அமைச்சா் சா.மு.நாசா், ஆட்சியா் மு.பிரதாப் ஆகியோா் காணொலி காட்சி மூலம் பாா்வையிட்டனா்.

திருவள்ளூா் மாவட்டத்தில் ‘உங்களுடன் ஸ்டாலின் திட்டம்’ முகாம்கள் மூலம் பல்வேறு துறைகள் சாா்பில் 48,986 மனுக்கள் பெறப்பட்டன.

இந்த மனுக்களை பரிசீலனை செய்து மொத்தம் 10,600 பேருக்கு ரூ. 2.67 கோடி நலத் திட்ட உதவிகளை அவா் வழங்கினாா்.

முன்னதாக, மாற்றுத்திறனாளிகள் நலத்துறை சாா்பில், தலா ரூ. 1,01,800 மதிப்பில் 68 மாற்றுத்திறனாளிகளுக்கு இணைப்பு சக்கரம் பொருத்தப்பட்ட பெட்ரோல் வாகனங்களையும் அவா் வழங்கினாா்.

இந்த நிகழ்வில் சட்டப்பேரவை உறுப்பினா்கள் வி.ஜி.ராஜேந்திரன் (திருவள்ளூா்), ஆ.கிருஷ்ணசாமி (பூந்தமல்லி), எஸ்.சந்திரன் (திருத்தணி), துரை.சந்திரசேகா் (பொன்னேரி), டி.ஜே.கோவிந்தராஜன் (கும்மிடிப்பூண்டி), மாவட்ட ஊரக வளா்ச்சி முகமை திட்ட இயக்குநா் வை.ஜெயக்குமாா், மாவட்ட வருவாய் அலுவலா் ச.சுரேஷ், தனித் துணை ஆட்சியா் (ச.பா.தி) பாலமுருகன், வருவாய் கோட்டாட்சியா்கள், வட்டாட்சியா்கள், வருவாய் துறைசாா்ந்த அலுவலா்கள் மற்றும் பயனாளிகள் பங்கேற்றனா்.