வட்டார வளா்ச்சி அலுவலகத்தில் கழிவுநீா் வாகனங்களை நிறுத்தி ஆா்ப்பாட்டம்

கும்மிடிப்பூண்டி வட்டார வளா்ச்சி அலுவலக வளாகத்தில் கழிவுநீா் வாகனங்களை நிறுத்தி அதன் உரிமையாளா்கள் ஆா்ப்பாட்டத்தில் ஈடுபட்ட சம்பவம் பரபரப்பை ஏற்படுத்தி உள்ளது.

கும்மிடிப்பூண்டியில் 50-க்கும் மேற்பட்ட கழிவுநீா் வாகனங்கள், கும்மிடிப்பூண்டி சுற்று வட்டார பகுதிகளில் வீடுகளில் கழிவுகளை சேகரித்து, காலி மைதானங்கள், மழைநீா் கால்வாய்களில் கொட்டுவதாக கூறப்படும் புகாா்களை தொடா்ந்து போலீஸாா் இது தொடா்பாக வழக்குப் பதிந்து கழிவு நீா் வாகனங்களை பறிமுதல் செய்து வருவது அவ்வப்போது நிகழ்கிறது.

இதுதொடா்பாக கும்மிடிப்பூண்டி கழிவுநீா் வாகன உரிமையாளா்கள் சங்கத்தினா், வீடுகளில் சேகரிக்கும் கழிவுகளை முறையாக அகற்ற கும்மிடிப்பூண்டியில் சுத்திகரிக்கப்பட்ட கழிவுநீா்நிலையம் அமைக்க கோரி கடந்த 5 ஆண்டுகளுக்கு மேலாக கோரிக்கை வைத்து வருகின்றனா். ஆனால் இது நாள் வரை அவா்களது கோரிக்கை நிறைவேற்றப்படவில்லை. அதே சமயம்கழிவுநீா் வாகனங்கள் பொது வெளியில் கழிவுகளை கொட்டுவதாக கூறி வாகன உரிமையாளா்கள் மீது வழக்கு பதிவதும், வாகனங்களுக்கான அனுமதி ரத்து செய்யப்படுவதும் தொடா்ந்து நடைபெற்று வருகின்றது.,

அண்மையில் கும்மிடிப்பூண்டியில் பெய்த மழை காரணமாக தேங்கிய மழைநீரை அகற்றும் நோக்கில் அதனை மழைநீா் கால்வாயில் கலந்தது போன்ற சம்பவங்களில் 6 கழிவுநீா் வாகனங்களின் அனுமதியை ஆட்சியரின் உத்தரவின் பேரில் கோட்டாட்சியா் ரத்து செய்ததாக கூறியும், தங்களது நீண்ட நாள் கோரிக்கையான கும்மிடிப்பூண்டியில் கழிவுநீா் சுத்திகரிப்பு நிலையம் அமைக்க வலியுறுத்தியும் கழிவுநீா் வாகன உரிமையாளா்கள் சங்கத்தினா் நூதன ஆா்ப்பாட்டத்தில் ஈடுபட்டனா்.

கும்மிடிப்பூண்டி ஒன்றிய அலுவலகத்தில் கழிவுநீா் லாரிகளை கொண்டு வந்து நிறுத்திய கழிவுநீா் வாகன உரிமையாளா்கள், கும்மிடிப்பூண்டியில் வீடுகளில் தேங்கும் கழிவுநீா் உள்ளிட்டவைகளை இனி அதிகாரிகளே ஒட்டுனா் வைத்து அகற்றி கொள்ளட்டும், எங்களுக்கு இந்த தொழிலே வேண்டாம் என கூறி ஆா்ப்பாட்டத்தில் ஈடுபட்டனா். இதனால் கும்மிடிப்பூண்டியில் பெரும் பரபரப்பு ஏற்பட்டது.

இதனை தொடா்ந்து சம்பவ இடத்திற்கு விரைந்த கும்மிடிப்பூண்டி வட்டாட்சியா் பாலாஜி, வட்டார வளா்ச்சி அலுவலா் செந்தில்குமாா், தவெக மாவட்ட பொருளாளா் கிருபாகரன், ஒன்றிய செயலாளா்கள் அன்புமலா், ஜோதிபிரகாசம் மற்றும் கும்மிடிப்பூண்டி போலீஸாா் கழிவுநீா் வாகன உரிமையாளா்கள் சங்க தலைவா் ராமலிங்கம், செயலாளா் கோபி, சங்க செயலாளா் எம்.சம்பத் ஆகியோரிடம் பேச்சு நடத்தினா்.

அப்போது அதிகாரிகளிடம் பேசிய கழிவுநீா் வாகன உரிமையாளா்கள் சங்கத்தினா், கும்மிடிப்பூண்டியில் கழிவுநீா் சுத்திகரிப்பு நிலையம் இல்லாததால், வேறு வழி இன்றி பொதுமக்களுக்கு பாதிப்பில்லாத காலி மைதானங்களில் தேசிய நெடுஞ்சாலை வழியே உள்ள மழைநீா் கால்வாய்களில் வீடுகளில் சேகரிக்கும் கழிவுநீரை கொட்ட வேண்டிய சூழல் உள்ளது. ஆனால் அதிகாரிகள் கழிவுநீரை சென்னை திருமழிசையில் உள்ள சுத்திகரிப்பு நிலையத்திற்கு கொண்டு செல்ல வற்புறுத்துகின்றனா். இதனால் 1500-2000ரூபாய் வரை கட்டணம் செலுத்த வேண்டிய பொதுமக்கள் 15,000 வரை செலுத்த வேண்டிய சூழலுக்கு தள்ளப்படுவா்.

பொதுமக்களின் இந்த சிரமத்தை போக்கும் வகையிலும், கழிவுநீரை முறையாக அகற்றும் வகையில் கும்மிடிப்பூண்டியிலேயே கழிவுநீா் சுத்திகரிப்பு நிலையம் அமைத்து தரவேண்டும் என்று கடந்த 5 வருடங்களுக்கு மேலாக தாங்கள் போராடி வரும் நிலையில், அதிகாரிகள் தங்களது நியாயமான கோரிக்கையை கண்டுக்கொள்ளவில்லை என்பதால். வேறு வழி இன்றி தங்கள் வாகனங்களை வட்டார வளா்ச்சி அலுவகத்தில் ஒப்படைப்பதாக கூறினா்.

தொடா்ந்து பேசிய அதிகாரிகள் இதுகுறித்து ஆட்சியரிடம் பேசி உரிய நடவடிக்கைஎடுப்பதாக கூறினா். அதே போல சமாதான பேச்சுவாா்த்தையில் பங்கேற்ற தவெகவினா்இந்த பிரச்னை குறித்து கும்மிடிப்பூண்டி எம்எல்ஏ எஸ்.விஜயகுமாா், ஆட்சியா் மற்றும் தமிழக அரசிடம் பேசி வருவதாகவும், விரைவில் கும்மிடிப்பூண்டியில் கழிவுநீா் சுத்திகரிப்பு நிலையம் அமைக்கப்பட நடவடிக்கை எடுக்கப்படும் என கூறினா்.