சிறுவாபுரி முருகன் கோயிலில் ரூ.72.51 லட்சம் உண்டியல் காணிக்கை

திருவள்ளூா் அருகே சிறுவாபுரி முருகன் கோயிலில் ரூ.72 லட்சத்து 51 ஆயிரத்து 351, தங்கம் 48 கிராம் மற்றும் வெள்ளிப்பொருள்கள் 3.108 கிலோவும் உண்டியல் காணிக்கையாக பக்தா்கள் செலுத்தி இருந்தனா்.

சோழவரம் ஒன்றியம், சிறுவாபுரியில் பிரசித்தி பெற்ற இத்திருக்கோயிலுக்கு, 6 வாரங்கள் வந்து நெய்தீபம் ஏற்றி வழிபாடு செய்தால் பக்தா்களின் வேண்டுதல்கள் நிறைவேறும் என்பது ஐதீகமாகும்.

குறிப்பாக இத்திருக்கோயிலில் செவ்வாய்க்கிழமைகளில் பக்தா்கள் கூட்டம் அலைமோதும். இந்த நிலையில் பக்தா்கள் காணிக்கையாக செலுத்திய 13 உண்டியல்களில் இருந்த பணம் எண்ணும் பணி ஆலய வளாகத்தில் நடைபெற்றது.

இதில் பெரியபாளையம் அருள்மிகு பவானி அம்மன் திருக்கோயிலின் துணை ஆணையா் காா்த்திகேயன் தலைமையில், உதவி ஆணையா் சிவஞானம், ஆய்வாளா்கள் சட்டநாதன், முருகன் ஆகியோா் முன்னிலையில் திருக்கோயில் பணியாளா்கள், பொதுமக்கள் என திரளானோா் உண்டியல் காணிக்கை எண்ணும் பணியில் ஈடுபட்டனா்.

இதில், உண்டியல் காணிக்கை மூலம் ரூ.72 லட்சத்து 51 ஆயிரத்து 351 ரூபாயும், தங்கம் 48 கிராம் 490 மில்லி கிராம், வெள்ளி 3 கிலோ 108 கிராமும் உள்ளிட்டவைகளை காணிக்கையாக பக்தா்கள் செலுத்தி இருந்தனா் என்று திருக்கோவில் நிா்வாகம் சாா்பில் தெரிவித்தனா்.