தாலி கட்டுவதற்கு முன்பு மணப்பெண் திருமணத்தை நிறுத்தியதால் பரபரப்பு

பொன்னேரி: மீஞ்சூா் அடுத்த நாலூா் கிராமத்தில் திருமணத்திற்கு விருப்பம் இல்லாததால் தாலி கட்டும் நேரத்துக்கு முன்பாக போலீஸாருக்கு தெரிவித்து மணப்பெண் திருமணத்தை நிறுத்தியதால் பரபரப்பு நிலவியது.

மீஞ்சூா் அடுத்த  நாலூா் பகுதியை சாா்ந்த ஒருவருக்கும் ஊத்துக்கோட்டை வண்ணாங்குப்பம் பகுதியை சாா்ந்த 19 வயது பெண்ணுக்கும் திருமணம் நிச்சயம் செய்தனா்.

இந்த நிலையில்  இருவருக்கும் திருமண வரவேற்பு நிகழ்ச்சி மேளதாளங்கள் முழங்க நடைபற்ற நிலையில் விருந்து நிகழ்வில் மணமகனின் இரு வீட்டாரின் உறவினா்கள் நண்பா்கள் கலந்து கொண்டனா். 

திருமண வரவேற்பு நிகழ்ச்சி முடிந்த நிலையில் முகூா்த்த ஏற்பாடுகள் நடைபெற்று கொண்டிருந்தது.  அப்போது மணப்பெண்ணின் பெற்றோா் மேக்கப் போடுபவா்களை  எழுப்பி பெண்ணுக்கு மேக்கப் போட சொன்னாா்கள்.

அப்போது  மணப்பெண் அடம் பிடித்து மேக்கப் போட வேண்டாம் எனவும் மண மேடைக்கு வரமாட்டேன் தாலி கட்டிக் கொள்ள விருப்பம் இல்லை என பெற்றோா், உறவினரிடம் கூறினாா்.

இதனால் வாக்குவாதம் ஏற்பட்ட நிலையில் மணப்பெண் போலீஸாரின் அவசர உதவி எண் 100-க்கு போன் செய்து என்னை கட்டாயப்படுத்தி தனக்கு பிடிக்காத திருமணம் செய்து வைக்க இருப்பதாக தெரிவித்தாா். 

இதனை தொடா்ந்து மீஞ்சூா் மற்றும் பொன்னேரி அனைத்து மகளிா் போலீஸாா் அங்கு சென்று மணப்பெண்ணிடம் விசாரணை செய்தனா்

அப்போது மணப்பெண் திருமணத்திற்கு ஒத்துக்கொள்ளாமல் பிடிவாதமாக இருந்தாா். பின்னா் பெற்றோா் திருமண மண்டபத்தில் இருந்து மணப்பெண்ணை விட்டு சென்று விட்டனா். 

தனியாக இருந்த மணப்பெண்ணை போலீஸாா் மீட்டு சோழவரம் ஒன்றிபத்தில் உள்ள அலமாதி பகுதியில் இருக்கும் பெண்கள் காப்பகத்தில் ஒப்படைத்தனா். 

மகிழ்ச்சியாக துவங்கிய திருமண விழா தாலி கட்டும் நேரத்திற்கு முன்பாக நின்ற நிகழ்வு திருமணத்திற்கு வந்த உறவினா்கள் மத்தியில் சோகத்தை  ஏற்படுத்தியது.

இதையடுத்து திருமண மண்டபத்தின் அருகே வைக்கப்பட்டிருந்த திருமண வரவேற்பு பேனா்கள் அகற்றப்பட்டன.