மொத்த விலை அடிப்படையிலான பணவீக்கம் மேலும் சரிவு

ஆகஸ்ட் மாதத்துக்கான மொத்த விலை அடிப்படை விலையிலான பணவீக்க விகிதம் பூஜ்ய நிலைக்கும் கீழே குறைந்து (-)4.95 சதவீதமாக இருந்தது என்று மத்திய அரசின் புள்ளிவிவரங்கள் தெரிவிக்கின்றன.
 முந்தைய ஜூலை மாத நிலையான (-)4.05 சதவீதத்தைவிட ஆகஸ்டில் பணவீக்க நிலை மேலும் குறைந்திருக்கிறது. கடந்த ஆண்டு நவம்பர் மாதத்திலிருந்து மொத்த விலை அடிப்படையிலான பணவீக்கம் பூஜ்ய நிலைக்கும் கீழே இருந்து வருகிறது என்பது குறிப்பிடத் தக்கது.
 வெங்காயம், பருப்பு வகைகள் தவிர பெரும்பாலான உணவுப் பொருள்களின் மொத்த விலை குறைந்தது. சில உணவு வகைகளின் மொத்த விலை மிகச் சிறிய அளவில் அதிகரித்தது. வெங்காயத்தின் மொத்த விலை 65% அதிகரித்தது. பருப்பு மொத்த விலை 36% அதிகரித்தது.
 இந்த நிலையில், பொருளாதார வளர்ச்சியைக் கருத்தில் கொண்டு வட்டி விகிதத்தைக் கணிசமாக ரிசர்வ் வங்கி குறைக்க வேண்டும் என்று இந்திய தொழிலக மற்றும் வர்த்தக சபைகளின் சம்மேளனத்தின் தலைவர் ஜோத்ஸ்னா சூரி கோரிக்கை விடுத்தார்.