சிட்பி வங்கியின் லாபம் ரூ.1,429 கோடி

சிட்பி (ஸ்மால் இண்டஸ்ட்ரீஸ் டெவலப்மெண்ட் பேங்க் ஆஃப் இந்தியா) வங்கியின் நிகர லாபம் சென்ற நிதி ஆண்டில் ரூ.1,429 கோடியாக அதிகரித்துள்ளது.
ஆண்டு பொதுக் குழு கூட்டத்துக்குப் பிறகு இதுகுறித்து அந்த வங்கி தெரிவித்துள்ளதாவது:
குறு, சிறு, நடுத்தர நிறுவனங்களின் மேம்பாட்டுக்கு கடன் வழங்குவதை முக்கிய இலக்காகக் கொண்டு செயல்பட்டு வரும் சிட்பி வங்கியின் வருவாய் சென்ற நிதி ஆண்டில் ரூ.6,600 கோடியாக அதிகரித்துள்ளது. கடந்த 2016-17 நிதி ஆண்டில் ஈட்டிய வருவாய் ரூ.6,346 கோடியுடன் ஒப்பிடுகையில் இது 4 சதவீதம் அதிகம். குறிப்பாக, வங்கியின் வருவாய் 2017 செப்டம்பரிலிருந்தே குறிப்பிடத்தக்க அளவுக்கு அதிகரித்தது. நிகர லாபம் ரூ.1,120 கோடியிலிருந்து 27.5 சதவீதம் வளர்ச்சி கண்டு ரூ.1,429 கோடியாகியுள்ளது. 
2017 மார்ச் 31-ஆம் தேதி நிலவரப்படி ரூ.79,682 கோடியாக இருந்த வங்கியின் மொத்த சொத்து மதிப்பு 2018-இல் 37 சதவீதம் அதிகரித்து ரூ.1,08,869 கோடியை எட்டியுள்ளதாக சிட்பி வங்கி தெரிவித்துள்ளது.