விஜயா வங்கியின் லாபம் 43% சரிவு

பொதுத் துறையைச் சேர்ந்த விஜயா வங்கியின் நிகர லாபம் முதல் காலாண்டில் 43.3 சதவீதம் சரிவடைந்துள்ளது.
இதுகுறித்து அந்த வங்கி மும்பை பங்குச் சந்தைக்கு திங்கள்கிழமை அளித்த அறிக்கையில் தெரிவித்துள்ளதாவது:
நடப்பு நிதி ஆண்டில் ஜூன் மாதத்துடன் முடிவடைந்த முதல் காலாண்டில் விஜயா வங்கியின் வருவாய் ரூ.3,935.77 கோடியாக இருந்தது. கடந்த நிதி ஆண்டின் இதே கால அளவில் ஈட்டிய வருவாய் ரூ.3,510.11 கோடியுடன் ஒப்பிடுகையில் இது அதிகமான அளவாகும்.
வாராக் கடன் மேம்பட்டுள்ள நிலையிலும் வங்கியின் நிகர லாபம் ரூ.254.69 கோடியிலிருந்து 43.3 சதவீதம் சரிவடைந்து ரூ.144.34 கோடியாக இருந்தது.
ஜூன் 30-ஆம் தேதி நிலவரப்படி மொத்த வாராக் கடன் விகிதம் 7.3 சதவீதத்திலிருந்து குறைந்து 6.19 சதவீதமானது. நிகர வாராக் கடன் விகிதமும் 5.24 சதவீதத்திலிருந்து சரிந்து 4.10 சதவீதமாக காணப்பட்டது என விஜயா வங்கி அந்த அறிக்கையில் தெரிவித்துள்ளது.