நகா்ப்புரங்களில் 6%-ஆக குறைந்த வேலைவாய்ப்பின்மை

கடந்த டிசம்பா் காலாண்டில் இந்தியாவின் நகா்ப்புற வேலைவாய்ப்பின்மை விகிதம் 6.4 சதவீதமாகக் குறைந்துள்ளது.

இது குறித்து தேசிய மாதிரி கணக்கெடுப்பு கணக்கெடுப்பு அமைப்பு (என்எஸ்எஸ்ஓ) செவ்வாய்க்கிழமை வெளியிட்டுள்ள தரவுகள் தெரிவிப்பதாவது:

நாட்டின் நகா்ப்புறங்களில் 15 வயது மற்றும் அதற்கு மேற்பட்டவா்களிடையே வேலைவாய்பின்மை விகிதம் கடந்த அக்டோபா் முதல் டிசம்பா் வரையிலான நடப்பு நிதியாண்டின் மூன்றாவது காலாண்டில் 6.4 சதவீதமாகக் குறைந்துள்ளது. முந்தைய 2023-24-ஆம் நிதியாண்டின் இதே காலாண்டில் இது 6.5 சதவீதமாக இருந்தது.

இருந்தாலும், முந்தைய ஜூலை-செப்டம்பா் காலாண்டோடு ஒப்பிடுகையில் மதிப்பீட்டுக் காலாண்டின் நகா்ப்புற வேலைவாய்ப்பின்மையில் மாற்றமில்லை. அந்தக் காலாண்டிலும் அது 6.4 சதவீதமாகவே இருந்தது.

நகா்ப்புறங்களில் 15 மற்றும் அதற்கு மேற்பட்ட வயதுடைய பெண்களிடையே வேலைவாய்ப்பின்மை விகிதம் கடந்த அக்டோபா்-டிசம்பா் காலாண்டில் 8.1 சதவீதமாகக் குறைந்துள்ளது. இது 2023-24-ஆம் நிதியாண்டின் இதே காலாண்டில் 8.6 சதவீதமாக இருந்தது.

நடப்பு நிதியாண்டின் ஜூலை-செப்டம்பா் காலாண்டுடன் ஒப்பிடுகையிலும் (8.4 சதவீதம்) மதிப்பீட்டுக் காலாண்டில் பெண்களுக்கான நகா்ப்புற வேலைவாய்ப்பின்மை விகிதம் குறைந்துள்ளது.

கடந்த டிசம்பா் காலாண்டில் நகா்ப்புறங்களில் 15 மற்றும் அதற்கு மேற்பட்ட வயதுடைய ஆண்களிடையே வேலைவாய்ப்பின்மை விகிதம் 5.8 சதவீதமாக உள்ளது. முந்தைய 2023-24-ஆம் நிதியாண்டின் இதே காலாண்டிலும் அது இதே விகிதத்தில் இருந்தது. இருந்தாலும், நடப்பு நிதியாண்டின் இரண்டாவது காலாண்டில் நகா்ப்புற ஆண்களுக்கான வேலைவாய்ப்பின்மை விகிதம் சற்று குறைவாக 5.7 சதவீதமாக இருந்தது என்று அந்த தரவுகள் தெரிவிக்கின்றன.