பகுதி - 545

விதம் இசைந்து இனிதா மலர் மாலைகள் குழல் அணிந்து அனுராகமுமே சொ(ல்)லி விதரணம் சொ(ல்)லி வீறுகளே சொ(ல்)லி... (இசையச் செய்வதற்குப்) பலவகையான உபாயங்களைக் கொண்டும்; இனிதான மலர்ச் சரங்களைக் கூந்தலில் அணிந்துகொண்டும்; ஆசைவார்த்தைகள் பேசியும்; தங்களுடைய அறிவைப் பற்றியும் உயர்வைப் பற்றியும் பேசிக்கொண்டும்;

அழகாக விரி குரும்பைகளாம் என வீறிய கனக சம்ப்ரம மேரு அது ஆம்... அழகாக விரிந்திருக்கும் இளநீர்கள் எனும்படியாகவும்; ஓங்கியிருக்கும் பொன்மயமானதும் சிறப்பானதுமான மேரு மலையைப்போல,

அதி விரகம் ஒங்கிய மா முலையால் எதிர் அமர் நாடி... அளவுகடந்த காமம் நிறைந்து ஓங்கிநிற்கும் பெரிய தனங்களைக் கொண்டு எதிர்ப்படுபவர்களின் விருப்பங்களை நிறைவேற்ற விரும்பியும்;

இதம் இசைந்து அ(ன்)னமாம் எனவே இன நடை நடந்தனர் வீதியிலே வர... இதமான முறையில் இசைந்துவரும் அன்னத்தைப் போல பலவகையாக நடந்து வருகின்ற பெண்கள் தெருவிலே வரவும்,

எவர்களும் சி(த்)தம் மால் கொ(ள்)ளும் மாதர் கண் வலையாலே எனது சிந்தையும் வாடி விடா வகை... யாருடைய மனத்தையும் மயங்கச் செய்வதான பெண்களடைய கண் என்னும் வலையால் என்னுடைய மனமும் நிலைதடுமாறாத வகையிலே,

அருள் புரிந்து அழகாகிய தாமரை இரு பதங்களினால் எ(ன்)னை ஆள்வதும் ஒரு நாளே... அருளைத் தந்து; அழகிய தாமரைகளைப் போன்ற உன்னுடைய இரு திருவடிகளாலம் என்னை ஆட்கொள்வதும் ஒருநாள் நடக்குமோ?  (ஒருநாள் என்று சொல்லப்பட்டிருப்பினும் ‘என்றோ ஒருநாள்’ என்று கொள்ளாமல், ‘உடனேயே’ என்று கொள்வதே பொருந்தும்.  ஆகவே, ‘என்னை உடனடியாக ஆண்டுகொண்டருளவேண்டும்’ என்பது பொருள்.)

மதம் இசைந்து எதிரே பொரு சூரனை உடல் இரண்டு கு(கூ)றாய் விழவே சின வடிவு தங்கிய வேலினை ஏவிய அதி தீரா... நிறைந்த செருக்கோடு எதிரிலே தோன்றிப் போரிட்ட சூரனுடைய உடலை இரண்டு கூறுகளாக விழும்படி வீழ்த்தியதும்; உக்கிரமான வடிவத்தைக் கொண்டதுமான வேலை ஏவிய அதிதீரனே!

மதுர இன் சொலி மாது உமை நாரணி கவுரி அம்பிகை யாமளை பார்வதி மவுன சுந்தரி காரணி யோகினி சிறுவோனே... மிக இனிமையான சொல்லை உடையவளும்; உமையென்றும்; நாராயணி என்றும்; பொன்னிறமான கௌரி என்றும்; அம்பிகை என்றும்; பச்சை நிறத்தவள் என்றும்; பார்வதி என்றும்; மோனநிலையில் நிற்பவள் என்றும்; ஜகத்காரணி என்றும்; யோகினி என்றும் பல நாமங்களைத் தாங்கிய அம்மையின் சிறுவனே! 

பதம் இசைந்து எழு லோகமுமே வலம் நொடியில் வந்திடு மா மயில் மீது ஒரு பவனி வந்த க்ருபாகர சேவக விறல் வீரா... உரிய நேரம் (வாய்த்ததும்) ஏழு உலகங்களையும் வலம் வந்ததான ஒப்பற்ற மயிலின்மேலே சுற்றிவந்த கருணையின் வடிவே! பராக்கிரமனே!  வெற்றி வீரனே! 

பருதியின் ப்ரபை கோடியதாம் எனும் வடிவு கொண்டு அருள்... கோடிக்கணக்கான சூரியர்களுடைய ஒளி ஒன்று திரண்டதைப் போன்ற வடிவத்தைக் கொண்டுநின்று அருள்பவனே! 

காசியின் மீறிய பழனி அம் கிரி மீதினில் மேவிய பெருமாளே.... காசியைக் காட்டிலும் சிறந்ததான பழனி மலையின் மீதிலே வீற்றிருக்கின்ற பெருமாளே! 

சுருக்க உரை

மிகுந்த ஆணவத்தோடு போருக்கு வந்த சூரனுடைய உடலை இரண்டு கூறாகும்படி கோபத்தின் வடிவமாக விளங்கும் வேலை வீசிய அதி தீரனே!  மிக இனிமையான சொல்லை உடையவளென்றும்; உமைமாது என்றும்; நாரணி என்றும்; பொன்னிறமான கௌரி என்றும்; அம்பிகையென்றும்; யாமளையாகிய பசிய நிறங்கொண்டவளென்றும்; பார்வதியென்றும்; மோன சுந்தரி என்றும்; ஜகத்காரணியென்றும்; யோகினியென்றும் பல நாமங்களைத் தாங்கிய பராசக்தியின் பாலகனே!  உரியநேரம் வாய்த்ததும் ஏழு உலகங்களையும் சுற்றி வந்ததான அழகிய மயின்மீது வலம்வருகின்ற கருணையின் வடிவே!  பராக்ரமனே!  வெற்றிவீரனே!  கோடி சூரியர்கள் ஒன்றுசேர்ந்ததைப் போல ஒளிவீசுகின்ற வடிவைத்தைக் கொண்டவனே!  அருள்பவனே!  காசியைக் காட்டிலும் சிறந்ததான பழனி மலையில் வீற்றிருக்கின்ற பெருமாளே!

(ஆடவர்) தங்களுக்கு இசைவதற்காகப் பலவிதமான உபாயங்களைக் கொண்டவர்களாகவும்; கூந்தலிலே மலர்ச் சரங்களைச் சூடியவர்களாகவும்; ஆசைவார்த்தைகளைப் பேசுபவர்களாகவும்; தங்களுடைய அறிவையும் சிறப்புகளையும் எடுத்துச் சொல்பவர்களாகவும்; இளநீர்களைப் போன்றவையும் பொன்னிறமான மேருவைப் போன்றவையுமான தங்களுடைய மார்பகங்களால் (எதிரே உள்ளவருடைய) விருப்பத்தை நிறைவேற்ற விரும்புபவர்களாகவும்; அன்னத்தைப் போல இதமானதும் பலவிதமானதுமான வகையிலே தெருக்களிலே நடை பயில்பவராகவும்; எல்லோருடைய மனங்களிலும் மயக்கத்தை ஏற்படத்துபவர்களாகவும் திரிகின்ற பெண்களுடைய கண்கள் என்னும் வலையினால் என் மனம் அலைபாயாதபடி

தாமரையைப் போன்ற உன்னுடைய இரண்டு திருவடிகளாலும் அடியேனை உடனடியாக ஆட்கொண்டருள வேண்டும்.