பகுதி - 559

கலைமேவு ஞானப் பிரகாசக் கடலாடி ஆசைக் கடலேறி ....  கலைகளெல்லாம் நிரம்பியுள்ள தன் அகத்திலே இருப்பதான ஞானமாகிய கடலில் மூழ்கிக் குளித்தும்; ஆசைகளாகிய கடலைக் கடந்தும்;

பலமாய வாதிற் பிறழாதே  பதிஞான வாழ்வைத் தருவாயே... வலுவானதும் உரத்து ஒலிப்பதுமான சமய வாதங்களில் நான் அகப்பட்டு திசைமாறிப் போகாதபடி, இறைவனைக் குறித்ததான சிவஞான வாழ்வைத் தந்தருள வேண்டும்.

மலைமேவு மாயக் குறமாதின் மனமேவு வாலக் குமரேசா... வள்ளி மலையிலே இருந்தவரும் அழகுடையவருமான வள்ளியின் மனத்திலே வீற்றிருக்கின்ற இளையவனான குமரேசா! 

சிலைவேட சேவற் கொடியோனே... வில்லேந்திய வேடனாக (வள்ளிக்காகக்) கோலம் தரித்தவனே!  சேவற் கொடியை ஏந்துபவனே!

திருவாணி கூடற் பெருமாளே.... ‘திருவாணிகூடல்’ எனப்படும் பவானி தலத்திலே வீற்றிருக்கின்ற பெருமாளே! 

சுருக்க உரை

வள்ளி மலையிலே இருந்தவளும் அழகுடையவளுமான வள்ளியின் மனத்திலே வீற்றிருக்கும் இளையவனான குமரேசனே! அவருக்காக வில்லேந்திய வேடனுடைய வடிவத்தில் வந்தவனே!  சேவற்கொடியை ஏந்தியவனே!  திருவாணிகூடலாகிய பவானி தலத்தில் வீற்றிருக்கின்ற பெருமாளே!

எல்லாக் கலைகளும் நிரம்பியதும்; தன்னுள்ளே விளங்குவதுமான ஞானக் கடலில் மூழ்கிக் குளித்தும்; ஆசைகளையெல்லாம் கடந்தும்; வலுவானதும் உரத்து ஒலிப்பதுமான வாதங்களிலே நான் தவறிப்போய்விடாதபடி இறைவனைக் குறித்த சிவஞான வாழ்வைத் தந்தருள வேண்டும்.