திருப்பாவை, திருவெம்பாவை போட்டியில் பங்கேற்க அழைப்பு

தூத்துக்குடியில் நடைபெறும் திருப்பாவை, திருவெம்பாவை ஒப்பித்தல் மற்றும் கட்டுரைப் போட்டியில் மாணவா், மாணவிகள் பங்கேற்கலாம் என அறிவிக்கப்பட்டுள்ளது.

இதுகுறித்து தூத்துக்குடி அருள்மிகு சங்கர ராமேஸ்வரா் கோயில் செயல் அலுவலா் கிருஷ்ணமூா்த்தி வெளியிட்ட செய்திக் குறிப்பு: தூத்துக்குடி மாவட்டத்தைச் சோ்ந்த மாணவா், மாணவிகளுக்கான பாவை விழா போட்டிகள், சிவன் கோயில் என அழைக்கப்படும் அருள்மிகு சங்கர ராமேஸ்வரா் கோயிலில் சனிக்கிழமை (ஜன. 9) காலை 10 மணிக்கு நடைபெறுகிறது.

ஒப்பித்தல் போட்டியில் 1 முதல் 5 ஆம் வகுப்பு வரை பயிலும் மாணவா், மாணவிகள் திருப்பாவையில் 1 முதல் 5 பாசுரங்கள் அல்லது திருவெம்பாவையில் 1 முதல் 5 பாசுரங்களை ஒப்பிக்க வேண்டும். கட்டுரைப் போட்டியில் பங்கேற்போா் திருஞானசம்பந்தா் பெருமை அல்லது பாவை நோன்பு என்ற தலைப்பில் எழுத வேண்டும்.

ஒப்பித்தல் போட்டியில் பங்கேற்க விரும்பும் 6 முதல் 8 ஆம் வகுப்பு வரை பயிலும் மாணவா், மாணவிகள் திருப்பாவையில் 1 முதல் 10 பாசுரங்கள் அல்லது திருவெம்பாவையில் 1 முதல் 10 பாசுரங்கள் ஒப்பிக்க வேண்டும். கட்டுரைப் போட்டியில் பங்கேற்போா் திருவெம்பாவையில் வான் சிறப்பு அல்லது ஆண்டாளின் பெருமை என்ற தலைப்பில் எழுத வேண்டும்.

ஒப்பித்தல் போட்டியில் 9 முதல் பிளஸ் 2 வரை பயிலும் மாணவா், மாணவிகள் திருப்பாவையில் 1 முதல் 20 பாசுரங்கள் அல்லது திருவெம்பாவையில் 1 முதல் 20 பாசுரங்களை ஒப்பிக்க வேண்டும். கட்டுரைப் போட்டியில் பங்கேற்போா் கோதைத்தமிழ் அல்லது திருவாசகத்தின் பெருமை என்ற தலைப்பில் எழுத வேண்டும்.

ஒவ்வொரு பிரிவிலும் முதல் மூன்று இடங்களை பெறுவோருக்கு பரிசுகள் வழங்கப்படும். மேலும், விவரங்களுக்கு 0461-2320680 என்ற தொலைபேசி எண்ணில் தொடா்பு கொள்ளலாம் என செய்திக் குறிப்பில் தெரிவிக்கப்பட்டுள்ளது.