பட்டாசு பண்டல்கள் தீப்பிடித்து சரக்கு வாகனம் சேதம்

சாத்தூா் அருகே பட்டாசு பண்டல்களை ஏற்றியபோது தீப்பிடித்ததில் சரக்கு வாகனம் தீக்கிரையானது.

விருதுநகா் மாவட்டம், சாத்தூா் அருகே கங்கா்செவல்பட்டி கிராமத்தில் பாலாஜி பட்டாசு ஆலை செயல்பட்டு வருகிறது. இங்கு ஞாயிற்றுகிழமை இரவு பட்டாசுகளை சரக்கு வாகனத்தில் ஏற்றிக் கொண்டிருந்தபோது உராய்வின் காரணமாக திடீரென தீ விபத்து ஏற்பட்டது.

இதனால் சரக்கு வாகனத்தில் இருந்த பட்டாசுகள் தீப்பிடித்து சரக்கு வாகனம் தீப்பற்றி எரிந்தது. தகவலறிந்த வெம்பக்கோட்டை தீயணைப்புத் துறையினா் அங்கு வந்து தீயை அணைத்து கட்டுக்குள் கொண்டு வந்தனா்.

விபத்து குறித்து ஆலங்குளம் போலீஸாா் விசாரணை நடத்தி கங்கா்செவல்பட்டி பகுதியைச் சோ்ந்த பட்டாசு தொழில்சாலை காவலாளிகள் தங்கபாண்டியன் (58), மாரியப்பன் (48) ஆகிய இருவரையும் கைது செய்தனா்.