காவல் துறையினா் இலவசமாக பட்டாசு வாங்கினால் கடும் நடவடிக்கை

விருதுநகா் மாவட்டத்தில் காவல் துறையில் பணிபுரியும் அதிகாரிகள், காவலா்கள் வருகிற தீபாவளி பண்டிகைக்கு இலவசமாக பட்டாசுகளை வாங்கினால் கடும் நடவடிக்கை எடுக்கப்படும் என விருதுநகா் மாவட்ட காவல் கண்காணிப்பாளா் கெளதம் கோயல் தெரிவித்தாா்.

இதுகுறித்து அவா் சனிக்கிழமை வெளியிட்ட செய்திக் குறிப்பு: விருதுநகா் மாவட்டத்தில் காவல் துறையில் பணிபுரியும் அதிகாரிகள், காவலா்கள் பட்டாசு தொழில் சாலைகள், பட்டாசு கடைகளில் முறையாக பணம் கொடுத்து தீபாவளி பண்டிகைக்கு பட்டாசு வாங்க வேண்டும்.

பணம் கொடுக்காமல் இனாமாக பட்டாசு வாங்கக் கூடாது. யாராவது பணம் கொடுக்காமல் பட்டாசு வாங்கியது கண்டறியப்பட்டால் அவா்கள் மீது கடும் நடவடிக்கை எடுக்கப்படும் என்றாா் அவா்.